Австрија донираше 1,6 млн. евра за енергетска ефикасност
Австрија донираше неповратна финансиска помош од 1,61 милион евра за креирање средина за воведување енергетска ефикасност во градежниот сектор во Македонија. За таа цел вчера во Скопје беше потпишан договор за грант меѓу македонскиот министер за економија, Фатмир Бесими, и шефот на Канцеларијата за австриска техничка соработка, Хајнц Хабертоер.
Министерот Бесими потсети дека потрошувачката на електрична енергија во Македонија е речиси 3,7 пати повеќе по единица БДП во споредба со другите европски развиени земји. „Mоже многу да се направи за енергијата да се троши порационално, што ќе биде од голема корист, како од енергетски и финансиски аспект, така и во поглед на заштитата на животната средина“, изјави Бесими.
Хабертоер информираше дека донацијата е за поддршка на Македонската агенција за енергетика во нејзините напори за намалување на потрошувачката на енергијата во станбените и во јавните згради. „Оваа цел ќе се постигне преку создавањето законски рамковни услуги за енергетска ефикасност во зградите, кампањите за подигнување на свеста, студиските посети, тренинг и пилот-проектите“, изјави Хабертоер.
Во делот на грантот со финансиски средства од 110.000 евра учествува и Швајцарија, а за да се реализира целиот проект македонското Министерство за економија ќе учествува со 115.000 евра. На меѓународно ниво потрошувачката на енергија во станбените објекти, деловни и административни згради, во што спаѓаат енергијата за греење, климатизацијата, осветлувањето, топлата вода и вентилацијата изнесува 40 отсто од вкупната потрошувачка. (Макфакс) |
