Претходен број

Укинувањето на визите за Македонија е остварлива цел

Мешовитиот парламентарен комитет меѓу ЕУ и Македонија очекува да се исполни заложбата за безвизен режим

Оливера Војновска

Укинувањето на визите наредната година може да стане реалност за македонските граѓани. Вакви се надежите на членовите на Мешовитиот парламентарен комитет меѓу ЕУ и Македонија, кој два дена заседаваше во Скопје. Во заклучоците од состанокот на Комитетот се поздравува почнувањето на дијалогот за визна либерализација со надеж дека членките на ЕУ ќе ја исполнат заложбата за воспоставување безвизен режим во 2009 година.

Пратеникот во Европскиот парламент, Евгениј Кирилов, по завршувањето на состанокот изјави дека укинувањето на визниот режим е остварливо и можно и оти Македонија е лидер во однос на ова прашање пред останатите балкански земји. „Можно е да се укине визниот режим до крајот на 2009 година доколку се направат уште неколку работи“, рече тој. Одговарајќи на новинарско прашање, Кирилов појасни дека Македонија треба целосно да го заврши процесот на демаркација на границата со Косово, да профункционира интегрираниот систем за гранично управување. „Кај пасошите имате добар напредок и сосема е реално дека во наредните месеци ќе го имате капацитетот“, рече Кирилов.

Копретседавачот на Комитетот, пратеникот Александар Спасеновски, соопшти: „Членовите на ова тело се согласија процесот на укинување на визите да заврши што поскоро и сметаме дека 2009 година е вистинскиот период. Се надевам дека надлежните институции, какви што се Советот на ЕУ многу повеќе, а многу помалку ЕК, ќе го остварат ветувањето“

Вториот претседавач Антониос Тракателис, прашан дали Грција ќе ја почитува одлуката за укинување на визите доколку биде донесена, рече: „Грчката амбасада во Скопје издава 100.000 визи годишно, Канцеларијата во Битола издава уште 30.000. Тоа е многу повеќе отколку другите земји на ЕУ“. Во врска со спорот со името Тракателис рече дека ова прашање не било вклучено во агендата на Мешовитиот комитет, но не ја исклучи можноста да се случи тоа во иднина.

Членот на Мешовитиот парламентарен комитет, Сеп Кустачер, рече дека пред да дојдат во Македонија го наметнал прашањето за името како ирационална препрека на патот кон евроинтеграциите. „Го иницирав прашањето зашто сум уверен дека тоа е препрека во рамките на еден вообичаен тип преговори за различни типови прашања што би требало да го олеснат патот за членство во ЕУ. Јасно е дека мора да го расчистиме патот колку што е можно побрзо. Ова е мошне деликатно прашање, затоа што името не е само симбол. Името е нешто повеќе, тоа е тесно поврзано со идентитетот. Оттука е мошне, мошне тешко кога некоја друга држава бара да си го смениш името“, рече Кустачер.