Отворените граници „иселиле“ 200.000 граѓани

ТЕТОВО - „Откако Македонија ја доби визната либерализација околу 200 илјади наши сограѓани, главно, на помлада возраст, ја напуштиле земјава во потрага по егзистенција. Голем дел од нив се со високо образование или изградени стручњаци, кои требаше да го понесат товарот на развојот на земјата. Наместо да го дадат својот придонес овде во родната татковина, тие сега се растурени по светот“.

Ова го нагласи Тито Петковски, лидер на НСДП, на трибина на oпозицискиот фронт, што се одржа завчера во Тетово. Тој вчера во изјава за „Утрински весник“, појасни дека располага со неофицијални информации дека млади и квалификувани кадри масовно се иселуваат во други земји и дека нивната точна бројка ќе се утврди со претстојниот попис.

„Како тие луѓе да останат овде кога немаат никаква гаранција за опстанок и не гледаат сигурност во актуелната власт, која е полна со демагогија и популизам. Владата е неодговорна и треба што побргу да замине. За многу прашања власта вели дека ќе го консултира народот, а за ниедно досега не го направи тоа “, рече Петковски пред опозиционерите од Тетово.

Лидерот на НСДП истакна дека преку буџетот бесцелно се трошат средствата на граѓаните. „Големи финансии се одлеваат во странство, за надоместоци на министри што се дојдени овде за да спечалат. Нивната тенденција е да ја исцедат Македонија и да ја изолираат до максимум“.

Потпретседателот на СДСМ, Зоран Заев, пак, повика на смиреност, за, како што рече, да се запре безнадежноста кај граѓаните. Тој констатираше дека земјата е соочена со бескрупулозно владеење и економско уништување.

„Неопходно е да се редефинираат економијата и политиката. Буџетот, со огромните средства што во него се акумулираат, треба да биде генератор и да се насочи кон економска иднина. Сега од тој буџет се богатат седум-осум души и го изнесуваат капиталот надвор од државата. Ние другите немаме резервен план. За нас е најважно да го покренеме економскиот тренд и да обезбедуваме услови за економски раст“, нагласи Заев.

Тој како пример за развој ја посочи Струмица. „Без учество на централната власт, со поттикнување на локалните можности, во Струмица се отворени 28 нови фабрики со околу 3.000 вработени. До крајот на годината очекуваме уште 16 нови фабрики и 15 пункта со околу 2.000 работни места и пак без помош од централната власт и само со локални сили“, го пренесе Заев искуството од општината што ја раководи. На

трибината во Тетово тој ја афирмираше определбата на СДСМ за решителност кон нови резултати, за елиминирање на пропустите што ги правела оваа

партија кога била на власт, но и за реформи во јавната администрација,

„која треба да се исчисти од баластот и неквалитетот“. (Г.Е.)