Исчезна „македонско претседателство“

Од нашиот известувач
Тамара Грнчароска

СТРАЗБУР - Историскиот ден на Македонија во Советот на Европа траеше само неколку часа, односно толку колку што стоеше на порталот на оваа организација именувањето „македонско претседателство“. И покрај најавите, министерот Антонио Милошоски претседаваше од маса на која пишуваше ПЈРМ, и освен во неговата папка и на веб-страницата на претседателството подготвена од Македонија, секаде се појави референцата. Сепак, за првиот човек на Советот на Европа, генералниот секретар Тјорнборн Јагланед, тоа нема да го попречи македонското претседателство со Комитетот на министри на организацијата. Јагланд посочи дека иако прашањето со името е важно за двете земји, сепак, има и други важни прашања кои не треба да бидат засенети од него, како што е програмата на македонското претседавање. Според него, тоа е од интерес на сите земји.

Јагланд на брифингот за македонските новинари на некој начин ја заокружи дискусијата околу употребата на придавката „македонско“ во името на нашето претседателство. „Кога бев во Скопје, бев информиран од вашата Влада за употребата на придавката ’македонско’ во именувањето. Тоа е одлука на една независна држава и нејзината влада, но тука во оваа куќа вие сте примени под референцата ’поранешна Југословенска Република Македонија‘ и ние мора да го употребуваме тоа“, изјави Јагланд. Според него, Советот не сака да прави проблеми на процесот на преговорите што се одвиваат под покровителство на ОН, па поради тоа, како што рече тој, „мора да се држиме до формалностите“. „Мора да живееме со тоа и мислам дека претседателството не треба да се занимава толку со тоа, туку треба да се фокусира на посуштинските работи, како што е исполнувањето на приоритетите“, рече Јаганд.

Сепак, на денот на преземањето на претседателството од страна на Македонија, неофицијално, шефот на шведската дипломатија, Карл Билт, изјави дека именувањето „македонско претседателство“ не го попречува процесот во ОН, кој се води меѓу Грција и Македонија околу името.

Запрашан зошто спорот со името, како европско прашање, не се решава во Советот на Европа, Јагланд само кратко одговори: „Бидејќи двете страни сакаа тој да се решава во ОН“. „Точно е дека тоа е европско прашање, но двете страни сакаат да го решат во ОН на прагматичен начин“, беше прецизен генералниот секретар.

За логото на „македонското претседателство“, кое прво беше поставено, па потоа исчезна од официјалниот сајт на Советот на Европа, Јагланд избегна да одговори, посочувајќи дека официјалното име под кое нашата земја е примена во Советот е Поранешна Југ��словенска Република Македонија и поради тоа на сајтот стои претседателство на ПЈРМ. (Т.Г.)