Министерот си ја испофали надворешната политика

Милошоски не би имал ништо против доколку во Собранието се постигне согласност за стратегија за името

Тамара Грнчароска



Со пофални зборови за сето она што го направила македонската дипломатија во изминатата година и без трошка самокритичност, помина вчера излагањето на министерот за надворешни работи, Антонио Милошоски, за тоа што сработила македонската дипломатија во изминатава година.

Пред собраниската Комисија за надворешна политика Милошоски најпрвин се пофали за шестмесечното претседавање на земјава со Советот на Европа, што, според него, покажало дека ние сме активен и сериозен член на меѓународната заедница.

Како втора тема, тој го истакна стратегискиот приоритет за што поскоро започнување на преговорите со ЕУ, при што побара Европскиот совет овој пат да ја прифати препораката од ЕК за започнување на преговорите за членство и посериозно да пристапи кон интегрирањето на земјава, бидејќи тоа би помогнало за изнаоѓање на решение за името.

„Македонија има добри остварувања, добри реформи и е пред започнување преговори за членство“, рече Милошоски, според кого, одлуката на Советот за датум за преговорите ќе придонесе и за зголемување на угледот на процесот на пристапување.

Тој се обиде да ги амортизира критиките во ноемврискиот извештај на ЕК, но и оние што стигнуваат од Брисел, за нападите што се вршат врз претставниците на ЕУ, со зборовите дека Македонија во Унијата гледа природен партнер и сојузник за нашето зачленување.

Милошоски за спорот околу името и за односите со Грција го повтори познатиот став дека земјава ќе остане силно вклучена во преговорите за името, дека е за решение што нема да и' наштети ниту на една страна и дека Грција треба да биде конструктивна страна во преговорите.

Како потврда за нашата конструктивност, Милошоски ги подвлече интензивираните контакти со Грција. „Македонија останува на градење рамноправни, добрососедски односи без какви било уцени и условувања, што ќе доведе до решение“, рече тој, според кого, Грција засега само декларативно е за добрососедство, без да демонстрира такво нешто.

Односите со другите соседи, според Милошоски,се добри и одат по нагорна линија, при што тој не се осврна на ниту едно друго отворено прашање што го има земјава со другите свои соседи.

Од пратениците од опозицијата излагањето на Милошоски беше окарактеризирано како монотоно фразерство и повторување реченици од минатата година. Бучковски побара од Милошоски да признае дека се води погрешна надворешна политика и да се изгради нова, која ќе добие консензус од сите.

Бучковски предупреди дека на 15 декември на Македонија ќе и' се повтори искуството од лани со Европскиот совет и според него, актуелната политика води кон зголемување на евроскептицизмот во земјава.

Милошоски на тоа му одговори дека во позиција во која се наоѓа земјава успех е што е толку висока поддршката за ЕУ, а за феноменот на евроскептицизмот, тој рече дека зависи и од другата страна, во случајов ЕК. Бучковски побара и поголема транспарентност на власта кон пратениците и Комисијата во водењето на надворешната политика.

Бучковски и Ѓорѓи Оровчанец споделија став дека Милошоски се повлекол од улогата на носител на надворешната политика на земјава, едниот, поради неверувањето на министерот во политиката што ја води, другиот, поради тоа што тој знае дека битката е загубена.

Оровчанец побара од Милошоски, конечно, две години по Букурешт, да се обелодени стратегијата на Македонија во преговорите за името, на што Милошоски одговори дека не би имал ништо против доколку со Собранието се постигне согласност за ова сложено прашање.