ФЕСТИВАЛ
„Атомик веџи“ победник на „Винер фест“
По мини-турнејата во Битола, Штип и во Скопје, во саботата вечерта, 22 ноември, заврши осмото издание на „Винер фест“, со скопскиот бенд „Атомик веџи“ како победник. Финалето, всушност, беше свирката на десетте групи во МКЦ. По Битола и Штип, „винерите“ се претставија и пред скопската публика. Збирот на гласовите од трите града покажа дека победник за оваа година е „Атомик веџи“ од Скопје, кој ќе снима албум за „Литиум рекордс“ следнава година.
Трката беше неверојатно тесна и „Атомик веџи“ победи само со шест гласа разлика во споредба со кичевците од „Рејвен“.
Оваа мини-турнеја, на која учествуваа повеќе од 50 луѓе, беше се', но не и натпреварувачка. Одличната атмосфера во винерскиот автобус се чувствуваше од самото поаѓање, а позитивниот дух преовладуваше до крајот на целата манифестација. Со громогласна песна иницирана од хрватскиот претставник „Битан тон“, салата на МКЦ на финалето ечеше од звуците на песната „Македонија“: „Таму кај што вечно сонце сјае...“ |
