Претходен број

Лустрацијата опасно оружје во изборната пресметка

Петар Арсовски вели дека се' што соопштило ВМРО-ДПМНЕ се политички мотивирани лаги и клевети

Политичките аналитичари сметаат дека со партиско лустрирање се губи смислата на лустрацијата

Оливера Војновска
Светлана Унковска

Силните обвинувања што ги искажаа двете најголеми партии од власта и од опозицијата, посочувајќи конкретни имиња на личности за кои тврдеа дека своевремено граделе кариера по принципот на кодошење, го ставија под големи сомненија процесот на лустрација што допрва треба да почне.

Вчера не стивнаа реакциите во јавноста за тоа дека долгонајавуваниот прочистувачки процес на општеството почнал сосема погрешно, навлегувајќи во премногу опасни води.

Иницијаторот на лустрацијата и изготвувачот на Законот, Стојан Андов, вели дека е опасно тоа што партиите ја зеле работата во свои раце и пред официјалниот старт на кампањата почнаа самите да лустрираат. Андов вели дека никој освен Комисијата за лустрација не смее да се занимава со документите и напоменува дека се одговара за манипулирање и злоупотреба на документите.

Политичките аналитичари се чудат како е можно јавно да излегуваат произволни, непроверени податоци со кои се етикетираат луѓето и ги повикуваат надлежните институции да реагираат. Од Обвинителството не гледаат причина да се вклучат во оваа меѓупартиска пресметка, бидејќи воопшто не забележале елементи кои укажуваат дека се работи за издавање доверливи информации за соработка со полициските служби, туку биле изнесени податоци од судски спорови.

Андов нагласува дека Законот за лустрација е донесен за да може овој процес да биде регуларно спроведен и контролиран. „Затоа формиравме Комисија, за да не го прави тоа секој што ��е посака. Таквиот пристап е многу лош и ќе резултира со пресметки. Ако некој располага со одредени сознанија за кои мисли дека ќе и' помогнат на Комисијата, треба да и' ги достави, а не со нив да се пресметува јавно. Само Комисијата има право да објавува дали некој бил соработник со тајните служби или не. Во Законот е предвидено дека таквата информација може да се објави дури откако ќе се расчисти ситуација и ќе помине жалбената постапка. За давање лажна изјава и за неовластено објавување податоци се предвидени затворски казни. Никој нема право да го земе Законот во свои раце, за тоа се одговара“, вели Андов.

Тој не сака да коментира дали во конкретниот случај со податоците што ги објавија ВМРО-ДПМНЕ и СДСМ треба да реагира јавниот обвинител. „Има закон, во него се' е убаво напишано, не можам јас да давам совети и рецепти. Има институции и секој си ја знае својата работа и што треба да направи“, вели Андов. Според него, основниот проблем е во тоа што не профункционира Комисијата за лустрација.

И професорот на ФОН Мерсел Биљали нагласува дека соопштувањето информации за соработка со тајните служби е неовластено и забрането со закон. „Тоа е газење на достоинството на луѓето и на таков начин се губи поентата и смислата на лустрацијата и се претвора во лов на вештерки. Сето ова се прави од политички мотиви за да се дискредитира противникот. Постои Комисија и само таа треба да се занимава со лустрацијата. Ме чуди тоа што јавниот обвинител не реагираше на информациите што се објавија од партиските седишта“, вели Биљали и додава дека мора да престане ваквата практика.

Основниот јавен обвинител Стерјо Зиков во настапите на двете партии не видел случај што е опфатен со Законот за лустрација. „Се работи за судски процес и објавена пресуда, така што тука не гледам никакво кодошење или, пак, соработка со тајните служби. Законот за лустрација пропишува дека не смеат јавно да се обелоденуваат докази или имиња кои би биле вмешани, но во овој случај гледам само обичен судски процес, во кој пресудата е јавна и достапна и затоа не подлежи под Законот за лустрација“, вели обвинителот Зиков.

Заменик-претседателот на Комисијата за лустрација, Ѓорѓи Малковски, е дециден дека не ги интересираат ниту партиски ниту политички пресметки. „Ние сме независно тело и ќе се работиме исклучиво според Законот и со факти. Нема да обрнуваме внимание на партиските препукувања. Процесот е обемна и сериозен, треба многу внимателно и трпеливо да се работи. Мора темелно да се проверат сите документи и не смее да се даваат произволни оцени. Не прифаќаме и нема да се раководиме од јавното етикетирање на која било партија за која било личност“, ни изјави Малковски.

Носителот на советничката листа за град Скопје на СДСМ, актерот Петар Арсовски, најави дека ќе поднесе кривична пријава против Оливер Шамбевски од ВМРО-ДПМНЕ за клевета и за нарушување на неговиот углед, затоа што во обвинувањата биле изнесени лаги и клевети. Тој вели дека прв пат се соочува со „вакви подметнувања“ и дека „сето ова се само валкани игри на владејачкиот политички режим“.

Тој вчера го посетил и битолскиот суд каде што не нашол никакви документи кои би го поврзале со судењето на Шишков . „Во предистражната постапка во 1979 година дадов исказ затоа што тогаш во судот бев повикан заедно со уште осумдесетина лица, односно целата филмска и сценска екипа кои го снимавме филмот ’Време води’. Се сеќавам дека тогаш изјавив само дека ’она што го рекол Шишков било во многу пијана состојба и бил непресметлив‘. Со ваквиот мој исказ не можеа да го поткрепат обвинението и затоа не ме викнаа ниту како сведок, а Шишков поради недостиг од докази не го ни осудија, туку доби само условно“, вели Арсовски.

Тој е уверен дека ВМРО-ДПМНЕ сака да го дискредитира откако стана носител на советничката листа на СДСМ за град Скопје. „Ова не е ништо друго туку валкана и гнасна игра на владејачкиот политички режим. Ми се јавија од двете политички опции и ми рекоа дека сето ова е нормално во политиката, но не се согласувам дека валкани игри можат да бидат нормални. Ако е валкана политиката, тоа е затоа што ја валкаат политичарите и, во основа, и мојот ангажман е да се борам против ваквите работи“, вели Арсовски.

Вчера професорот Владо Поповски ги отфрли обвинувањата од СДСМ дека во 1991 година со груби зборови му се нафрлил на тогашниот секретар на правосудството и управа на Извршниот совет, актуелниот министер за правда Михајло Маневски. Поповски тврди дека тогаш не го познавал Маневски и се работи за друга личност со исто име и презиме.

„Ова се однесува на друг Владо Поповски, тој е од ЛДП и, всушност, станува збор за совпаѓање на името и презимето. Јас не сум од Слоештица и не сум работел во ’Млад борец’, а во 1991 година воопшто не сум го познавал Маневски и прв пат во животот го имам сретнато во 1997 година. Ако СДСМ останува на обвинувањата што ги изнесе дека се однесуваат на мене, јас ќе поднесам кривична пријава за клевета“, вели Поповски.

На неговата реакција се надоврзаа и од ВМРО-ДПМНЕ од каде што му порачаа на СДСМ одговорот да си го побараат во сопствените редови. „Лицето Владо Поповски за кого тие говореа е поранешниот министер во владата на Бучковски и тој не е носител на советничката листа на ВМРО-ДПМНЕ“, реагираше Шамбевски од ВМРО-ДПМНЕ.

СДСМ веднаш возврати и порачаа дека точно се знае на кој Владо Поповски мислат, односно дека тоа е носителот на советничката листа на ВМРО-ДПМНЕ.