Бугарите бараат одговорност и од капетанијата

Даниела Трпчевска

Првиот човек на охридската Капетанија, Љупчо Настески, исто така, треба да одговара за трагедијата во Охридското Езеро и потонувањето на бродот „Илинден“, во кој животот го загубија 15 бугарски туристи. Ваква порака испрати од Софија бугарскиот истражен судија, Георги Илиев, кој води паралелна истрага за причините за потонувањето на бродот. Обвинувањата се случуваат само неколку дена пред стартот на судскиот процес за големата несреќа, за која се обвинети капетанот на бродот и инспекторот на германската фирма „Лојд“.

Бугарските медиуми известуваат дека истражните органи во Македонија и во Бугарија дошле до сосема поинакви сознанија и заклучоци за причините за големата трагедија во Охридско Езеро. Повикувајќи се на изјавата на бугарскиот истражен судија Илиев, дадена за телевизијата БТВ, тие пренесуваат дека скинатата сајла не е причина за потонувањето на „Илинден“. Бугарските истражни органи сметаат дека причините што ги истакнуваат нивните македонски колеги дека скинатата сајла е причина за несреќата, не кореспондираат со вистината.

Тамошната паралелна истрага покажала дека сајлата на „Илинден“ и претходно често се случувало да се откине, но дека тоа не довело до потонување на бродот. Според Илиев, покрај сајлата и недостигот од контрола од страна на македонските институции надлежни за контрола на водниот сообраќај, мора да биде земена предвид како причина за трагедијата.

Бугарскиот истражен судија за бугарските медиуми вели дека првиот човек на охридската Капетанија, Љупчо Настески, исто така, мора да одговара, бидејќи Капетанијата не вршела проверка на бродовите што испловувале и оние што се враќале на пристаништето,и не вршела проверка на товарот што го превезувале, согласно со стандардите. Бугарските власти веќе побарале комплетна документација од земјава во врска со правата и обврските што ги има охридската Капетанија.