Претходен број

Клановска пресметка во десницата

Љубен Пауновски и Лупчо Георгиевски

Некогашните партиски соборци Георгиевски, Пауновски, Груевски и Бошкоски сега не сакаат да се видат

Соња Крамарска

Љубе Бошкоски вчера се упати кон битолското село Могила - се сеќавате онаму каде што за време на претседателската кампања беше исвиркан претседателот Ѓорге Иванов. Тогаш таму подобро не помина ниту премиерот Никола Груевски бидејќи голем дел од измамените млекари од „Сведмилк“ се токму од тоа подрачје. Но млекарите, како што е познато на крајот сепак му простија на ВМРО-ДПМНЕ, а Бошкоски сега отиде да ги праша како им е со старо-новата влада на десноцентристичката коалиција предводена од Груевски.

Визитата на Бошкоски на Могила не можеше да дојде во полошо време. Цела една седмица пред неговото вчерашно доаѓање во ова битолско село измина во знакот на препукувањата на Бошкоски со Груевски. На средина меѓу нив се најде Јохан Тарчуловски кој остана во Хаг за разлика од Бошкоски кој беше ослободен од сите обвиненија. Груевски, соочен со алармантен пад на својата популарност безобзирно почна да го користи Тарчуловски во пресметката со Бошкоски кому се' уште не може да му ги прости 150 илјади гласови што ги собра во првиот круг од претседателските гласови и кои се од контингентот на десницата.

На друга страна, пресметка се одвива и меѓу некогашната икона на ВМРО-ДПМНЕ Љупчо Георгиевски и Љубен Пауновски-некогашен министер за одбрана во владата на Георгиевски кој беше обвинет за криминал и кој близу една деценија води битка по судовите тврдејќи дека е невин. Пресметката меѓу нив двајцата кулминира со обвинувањето на Пауновски до Георгиевски дека во екот на конфликтот во 2001 заговарал промена на териториите на земјата во корист на Бугарија, на шт�� Георгиевски возврати дека Пауновски бил член на бугарофилското крило, а сега сака да му се додвори на новиот лидер на ВМРО-ДПМНЕ Груевски.

Јавноста не може да се изначуди од нивото на пресметката меѓу клановите во десницата. Бошкоски, кој на терен не располага со голема политичка сила од нејасни причини му е трн во око на Груевски, а судејќи според нападите врз Георгиевски актуелниот премиер се решил да се пресметува и со својот некогашен политички ментор- но преку Љубен Пауновски. Очигледно е дека Груевски тешко се помирува со критиката што доаѓа токму од политичката страна на која и самиот и припаѓа-десницата и дека се труди на сите начини да ги замолчи Георгиевски и Бошкоски кои не штедат зборови во лошото портретирање на актуелниот премиер.

Филип Петровски, некогашен актер на вмровската сага од деведесеттите, во колумна за нашиот весник осврнувајќи се на феноменот напади во внатрешноста на десницата вели дека Груевски е очаен поради падот на рејтингот и дека за тоа го обвинува Бошкоски и неговите критики. „Кога разбраа (врвот на ВМРО-ДПМНЕ, н.з.)дека Бошкоски не ќе биде лесно да се контролира, дека има свое мислење (па макар и да е погрешно), веднаш беше отпишан. Плус веќе не можеше пред народот да се користи како ЕПП секој ден бидејќи се врати од Хаг“, пишува Филип Петровски кој и самиот се наоѓа на спротивната страна од барикадите.

Некогашниот лидер, пак, на ВМРО-ДПМНЕ Љупчо Георгиевски за кој се верува дека се подготвува постепено да се врати на политичката сцена, се наоѓа на летен одмор надвор од земјава, но тоа не му пречеше да распали со сите оружја против Љубен Пауновски. Георгиевски, според одделни информации своите политики ќе ги искажува преку сопствена тинк-тенк организација која во иднина почесто ќе се огласува со цел да добие гласност на политичката сцена.

Следното што со внимание ќе го следи јавноста во оваа внатре-вмровска пресметка е дали нападите од Груевски ќе доведат до некаква неформална коалиција меѓу Георгиевски и Бошкоски бидејќи тие двајца постојано одрекуваат дека дејствуваат оркестрирано. Интересно е прашањето и каде ќе се позиционира Доста Димовска која не е во немилост кај Груевски, но се најде во метата врз која пука Љубен Пауновски.

Бошкоски во одбрана на Георгиевски

БИТОЛА - Поранешниот министер за внатрешни работи, Љубе Бошкоски, застана на страната на Љупчо Георгиевски во актуелните препукувања на експремиерот со својот поранешен министер за одбрана, Љубен Пауновски. Бошкоски вели дека иако политички се разликуваат со Георгиевски, сепак, за невистинити ги нарече обвинувањата за размена на територии и народи меѓу Македонија и Албанија.

„Жив сведок сум на настаните од 2000 и 2001 година и активен учесник. Најодговорно тврдам дека Георгиевски е апсолутно во право во однос на Пауновски. Овие напади за Љупчо Георгиевски и Доста Димовска се неосновани и веројатно нарачани од некој центар“, изјави Бошкоски во пелагониското село Могила каде што вчера беше во посета на тамошните фармери и земјоделци.

Што се однесува до последните обвинувања на адреса на Љубе Бошкоски, дека не помагал во одбраната на Јохан Тарчуловски , тој оваа ситуација ја толкува како уште еден линч од серијалот кој актуелната Влада го практикувала против него. Бошкоски овој пат со порака до актуелниот министер за одбрана, Зоран Коњановски. „Коњановски, кој излезе во одбрана на Груевски, ќе го запрашаме зошто ги остави македонските војници седум дена на аеродромот во Скопје со конзерва и по тие жештини. Иако формално ги испрати за Авганистан, за жал, тој излезе да брани нешто што не е одбранливо. Набргу ќе дојде денот кога некој ќе се срами, а јас ќе одам со крената глава“, порача Бошкоски. (А.Б.)