Заканите на Ахмети биле истрели во празно

Лидерот на ДУИ не сака да биде чувар на мирот во Македонија при евентуална поделба на Косово

Гордана Дувњак

Заканувачкиот тон во изјавата на лидерот на ДУИ, Али Ахмети, дадена токму на денот на илинденските празнувања, дека не може да го гарантира мирот во земјата доколку дојде до промена на границите на Косово, не ги возбуди премногу духовите во Македонија. И покрај тоа што доаѓа од устата на челникот на албанскиот коалиционен партнер, кој активно партиципира во власта и на кој при поделбата на владиниот колач му припадна да раководи со ресорот за одбрана, сепак, таа повеќе се доживува како реторичко прашање.

Познавачите на безбедносните прашања се убедени дека станува збор за политичка изјава, која претставува по��еќе пукање во празно и оти таа не е дадена за домашна употреба, туку повеќе како поддршка на косовското раководство за задржување на целосноста на Косово. Експертите се поделени во мислењата и околу тоа дали евентуалната поделба на Косово може да влијае врз стабилноста на Македонија, но и пошироко на Балканот.

Што кажа првиот алтернативец во интервјуто за државната косовска телевизија, а што го пренесе Тв Алсат-М?

„Ако има обиди за промена на границите, не преземам одговорност да бидам чувар на мирот во Македонија, зашто може да се дојде до ситуација луѓето сами да се организираат и да не може никој да ги контролира како во 1990, 1999 и во 2001 година. Ако се случат такви работи и ако ситуацијата излезе од контрола, никој не може да ја преземе одговорноста или да гарантира дека Албанците нема да се организираат во заеднички фронт во случај да бидат загрозени како целина“, изјави Ахмети.

Како што јави ТВ Алсат-М, во интервјуто за Државната косовска телевизија Ахмети ја поддржал интервенцијата на косовската влада во северниот дел на Косово.Тој ги оценил односите помеѓу Македонија и Косово дека се на „високо ниво“.

Поранешниот министер за полиција и актуелен пратеник од парламентарното мнозинство од редовите на Демократскиот сојуз, Павле Трајанов, е убеден дека повторното реафирмирање на идејата за поделба на Косово што ја поддржуваат некои земји-членки на ЕУ директно може да ја загрози безбедноста на регионот, а посебно во Македонија.

„Албанците може да бараат компензација на изгубените територии, таму каде што се во мнозинство. Ваквиот развој на настаните може да го дестабилизира Балканот и да има домино-ефект“, оценува Трајанов.

Претседателот на Балканскиот форум за безбедност, Благоја Марковски, пак, смета дека поделбата на Косово е можна само доколку се постигне договор меѓу косовските и српските власти, но такво сценарио моментно не е можно, а нема ни поддршка од меѓународниот фактор.

„Лично мислам дека стабилноста на земјава зависи од нашите внатрешните прилики, а помалку од влијанието од север. Македонија ќе биде толку целосна и стабилна колку што политичкото раководство ќе успее да ги санира потребите на населението и да се насочи кон решавање на нивните проблеми“, потенцира Марковски. Тој е уверен дека не постои безбедносен ризик и оти која било заедница нема интерес за повторување на она што се случи во 2001 година. Марковски не ја исклучува можноста за поединечни радикални отстапувања, но проценува дека тоа нема да има ефект за разградување на целосноста и единството на државното јадро.

Што се однесува до спорната изјава на Ахмети дадена за косовската државна телевизија, и двајцата соговорници се речиси на идентична линија.

Трајанов ја доживува како изразување јавен политички став што кореспондира со официјалната косовска политика околу (не)поделбата на Косово, додека за Марковски е во функција на искажување поддршка на тамошното раководство.

Сепак, и двајцата познавачи на безбедносните прилики ги повикуваат македонските власти на будност - со внимание да ги следат настаните во нашето соседство и навреме да превенираат со активности, но и јавни реакции во домашната јавност и во дипломатските кругови.