Душко казнет со 400 евра за навреда на премиерот

Одлуката на битолскиот суд одново го потресе фармерското семејство Илиевски

БИТОЛА - Четиристотини евра е глобата што треба да и' ја плати битолскиот фармер Душко Илиевски на државата за омаловажување на премиерот Никола Груевски. Вака одлучи Основниот суд во Битола откако МВР лани поднесе прекршочна пријава против фармерот за навреда на државен орган. Илиевски, како еден од оштетените кооперанти на „Сведмилк“, обвинет е дека лани на протестите на фармерите направил плакати со слика од премиерот Груевски и ги закачил на неколку бандери во Битола. На плакатите имало порака „Кражба во 100 чекори. Пред очите на власта исчезнаа 30 милиони евра - Остваруваме“.

Одлуката на битолскиот суд одново го потресе семејството Илиевски. За да ја плати казната од 400 евра, Душко вчера ја однесе на пазар и последната крава од својата штала, со намера да ја продаде. Пред две години во шталата на Илиевски имаше 86 глави добиток.

„Немам пари за леб, а камо ли да плаќам казна од 400 евра. Затоа ја носам на пазар и последната крава од мојата опустошена штала. Кравата ја чував за млеко за моите две деца и за двете внучиња од брат ми. Како чесен граѓанин, ќе и' ги платам сите казни од оваа власт, но ќе издржам на сите притисоци. Нема да се поколебам да кажам дека Груевски уништи 3.000 кооперанти на ‘Сведмилк‘. Сите не' донесе на питачки стап“, изјави Душко Илиевски додека се обидуваше да го совлада разбеснетото говедо и да го подготви за пазар.

Тој обвинува дека и овој случај е полициски монтиран, исто како што е и обвинението против него, против неговиот брат и татко му дека одгледувале марихуана на нивата со компири.

„Лажни полициски службеници сведочеа дека биле на местото на настанот и дека ме виделе како сум ги лепел плакатите со Груевски. На судот му понудивме да земат снимки од која било телевизија за да видат дека јас не ги лепев тие плакати. Но, судот одби“, објасни Илиевски.

Ова не е првата глоба што треба Душко да и' ја плати на државата. Пред една година нему му беше испорачана казна од 500 евра за поседување нелегално оружје. Фармерот беше обвинет дека, наводно, со пушката од неговиот дедо нишанел на мачки и кучиња.

Илиевски заедно со уште 26 кооперанти на „Сведмилк“ беше осомничен и за упад во Кабинетот на битолскиот градоначалник Владимир Талески, но судот ги ослободи од вина. (А.Б.)