Насловна

А1 манипулира за свои потреби

Соња Крамарска


Колегите од А1 телевизија прават груба манипулација кога „Утрински весник“ го ставаат во иста група со весниците „Време“, „Шпиц“ и „Коха е Ре“. Тврдењето дека „’Утрински весник‘ е последен во низата проблеми што ги трпат медиумите кои се критички настроени кон начинот на владеење на владата на Груевски“, може да го прифатиме како точно, но само во делот на тоа што се вика односи меѓу влади и медиуми, и тоа не само кај нас, туку и секаде во светот.

Но, јавноста, гледачите на А1 и читателите на „Време“, „Шпиц“ и „Коха е Ре“, како и читателите на „Утрински весник“ добро знаат дека „Утрински“ критикува влади откако постои и дека опсервациите и критичките оцени на политиката на сегашната Влада почнаа кога таа дојде на власт во 2006 година и траат се' до денеска. Додека, пак , А1, „Време“, „Шпиц“ и „Коха е Ре“ преминаа на страната на нас критизерите, откако нивниот сопственик ја растури калимерата со премиерот Никола Груевски.

И не само тоа, туку и рекламниот колач што Владата во големи ��ози го испорачуваше во изминатите пет години, барем половина од тоа време, заврши во касите на оваа телевизија и на трите весници. За разлика од нив, „Утрински весник“, кој сега А1 сака да го стави во нивна агенда, регуларно се бореше со нелојалната конкуренција од „Перо Наков“ и ги плаќаше редовно сите даноци и придонеси спрема државата. За тоа време во А1 врнеше дожд од пари, главно, од владин извор. „Утрински весник“ и тогаш, а и сега, не беше на рекламната агенда на Владата.

Затоа не сме исти и отфрлам какви било шпекулации во тој правец.

„Утрински весник“ се соочува со проблеми со кои се соочуваат најголем број медиуми во земјава. Мал пазар, пребирливи огласувачи, тука и таму и по некоја сопка од владини и од други моќни кругови. Но, тоа не е ништо ново и невидено. Се' е во рамките на работата што ја работиме и ние и други медиуми во земјава и низ светот.

Во таа смисла, крајно е непринципиелно од страна на оваа телевизија да користи ситуации и „Утрински весник“ да го става во политичка конотација или како дел од некакви агенди што немаат врска со реалните состојби. „Утрински весник“ е дел од издавачка компанија која е способна сама да ги детектира слабостите и околностите што влијаат врз работењето на медиумите и да изнајде решенија за присутните состојби. Ние немаме никаква врска ниту сличности со ситуацијата во која се наоѓаат А1 телевизија и весниците „Време“, „Шпиц“ и „Коха **** Ре“.