Претходен број

Зошто се изостава ДПМНЕ?

Авторот и' е познат на Редакцијата

Се обраќам до почитуваниот висок партиски активист на ДПМНЕ - Илија Димовски. Во својата колумна објавена во овој весник од 20 јули 2009 година, веќе ја прекрсти партијата во која членува во ВМРО. Го прашувам што е со името ДПМНЕ, што го доби од основачите, кога тие се вратија од емиграција и за претседател го именуваа студентот Љупчо Георгиевски. На предлог од еден од дојденците кон името ВМРО е додадено она - ДПМНЕ. Ова се зборови на еден од основачите - Јаковлевски.

Доколку раководствата на оваа партија се патриоти како што ни се претставуваат, ќе треба да се откажат од додавката ВМРО, бидејќи нема само оваа организација право да го користи - и големите патриоти Цветан Димов, Орце Николов, Страшо Пинџур и плејада како нив се организираа и, под водство на Комунистичката партија, поведоа народноослободителна војна, основаа држава со име Македонија, во која јас како гимназиски ученик можев слободно да го употребувам мајчиниот јазик, а не да морам своето школување да го почнам учејќи српски јазик, а потоа и бугарски јазик.

Што се однесува до визните олеснувања за кои многу зборови потроши, најнапред требаше да ги наведе условите, кои треба да ги исполни секој наш граѓанин кој ќе сака да патува во државите на шенген зоната. Најкарактеристичен е условот што можеме да престојуваме до три месеци, со писмо од роднини и банкарска гаранција дека има доволно средства и уште низа документи.

На Илија Димовски му препорачувам внимателно да го прочита коментарот со наслов „Македонски состојби“ на новинарот Милчо Митевски, кој со факти, а не со празни зборови и фалби, отслика зошто е формирана партијата ДПМНЕ. Ве повикувам Илија Димовски, во наредниот број, кога ви е ред да се јавите со своја колумна, исцрпно да дадете одговор на изнесените факти.

Ако с��е за национално единство тоа не се постигнува со вашиот речник како член на оваа партија, бидејќи „комуњарите“ ја создадоа државата со име Македонија и тие гинеа со името ВМРО, но она на Гоце Делчев и Јане Сандански, а не на Александров и компанија.