Сечачи чувани од стотина полицајци
Кристина Спироска, Скопје
Се обраќам по повод ужасната акција спроведена на 17 јули на улица „Илинденска“ и тоа на потегот од Владата на РМ па до Градскиот парк. Акцијата почна во 9 часот и се состоеше од организирано сечење на дрва од дрворедот на горенаведениот потег на улицата, проследено со огромен број униформирани лица, кои не објаснија што прават на тоа место, бидејќи на нашите прашања за нивното присуство во толкав број одговараа дека не знаат, и оти најверојатно ќе поминувала делегација, по што следуваше огромна бучава и работа од „делегација“ од дрвосечачи!!! Барајќи некој од одговорните лица кои го организираат „настанот“, се обратив до еден човек кој рече дека е надлежен од „Паркови и зеленило“ (Панче Стојановски) и без да го прашам подоцна да се објаснува дека има решение и дозвола за сечење, дека организатор е Град Скопје...
На моето прашање дали е свесен дека вршат нелегална активност, бидејќи целта поради која ја спроведуваат е проширување на улицата „Илинденска“, што е во спротивност како со Генералниот урбанистички план, така и со Деталниот урбанистички план, како и тоа дека над 500 граѓани се бунат и тоа не дозволуваат акција, како што е сечењето на тунелот од дрвја, тој одговори дека на повеќе луѓе тоа го сакале затоа што улицата била тесна и морала да се шири - крајно време било, и доста веќе сме се бунеле за глупости! По неколку минути дојде некој друг, по име Емил, кој, исто така, рече дека е надлежен и одговорен и на моето прашање која е целта, одговори дека овие дрва биле трули и постоела опасност да паднат, поради што ги сечеле за повторно да посадат нови.
Искрено надевајќи се дека можеби навистина е така, дојде уште еден господин кој побрза да ми каже оти и тој е од одговорните лица, кои се тука и објасни дека дрвата се сечат за да се поправи канализацијата! Не знаејќи кому да му верувам, с�� обратив до Град Скопје и тоа до градоначалникот - кој, нормално, беше недостапен за одговори, по што се јавив во Одделот за односи со јавност и информации со граѓани. Оттаму добив одговор дека воопшто не се запознаени со случајот, и да се јавам на друго место! Си го поставив прашањето како тоа е можно ако Град Скопје го организирана настанот (како што ми посочија одговорните лица на местото на настанот) да не знае овој Оддел што се случува? Па, сега би сакала да го поставам моето прашање, па ако некој се чувствува одговорен и задолжен да ми одговори: 1. Кој е поводот на акцијата за сечење дрва?; 2. Зошто не постоеше известување за тоа 24 часа однапред, како што е случај со сите други спроведени акции?; 3. Зошто постоеше армија од полицајци?; 4. Кој е тоа кој ја има моќта и дрскоста да работи и да спроведува активности спротивни на урбанистичките планови на Град Скопје? |
