Стартува специјализација по семејна медицина - многу отворени прашања

Јасмина Јовановска

Со новата студентска година на Медицинскиот факултет стартуваше и специјализацијата по семејна медицина. За почеток ќе специјализираат само 10 лекари. На конкурсот се пријавиле 16 кандидати и од Скопје и од внатрешноста, но симптоматично е што нема ниту еден кандидат од источна Македонија, каде што проблемот со достапноста на здравствената заштита во руралните подрачја е најголем. Медицинскиот факултет идната недела треба да направи селекција на кандидатите. Оттаму велат дека приоритет ќе им се даде на лекари кои доаѓаат од здравствените домови и кои имаат по неколку години работно искуство.

По завршувањето на специјализацијата, лекарите ќе добијат диплома која е призната во ЕУ, но ќе бидат обврзани да останат најмалку шест години од установата од каде што дошле.

Центарот за семејна медицина, кој е во близина на Деканатот на Медицинскиот факултет, в година ќе прерасне во катедра по семејна медицина, кога ќе почне и доедукацијата и на другите матични лекари по општа медицина, педијатрите, гинеколозите. Нивната едукација ќе трае од три месеци до една година, во зависност од претходната едукација и нивото на специјализација.

Сепак, околу реализацијата и заживувањето на семејната медицина во практика, оставени се многу отворени прашања. Државата ќе ја плати само првата година од специјализацијата, која трае три години и вкупно чини 3.000 евра. "Се' уште не се знае кој ќе ги плати трошоците за другите две години за десеттемина специјализанти", вели заменик-министерот за здравство, Владимир Поповски, зашто првата година е покриена со средства од кредитот од Светска банка за реформи на македонското здравство, кој завршува во јуни в година. Не се знае ни како ќе бидат платени лекарите, кога ќе почнат да работат, дали како концесионери или, пак, овие лекари ќе се вратат на стариот систем и ќе земаат плата. "Има согласност од Фондот за здравствено осигурување за финансиска мотивација на лекарите по семејна медицина, но како ќе се плаќаат, ќе се донесе политичка одлука", објасни заменикот Поповски.

На прашањето дали пациентите нема да имаат проблеми со упатување на повисоко здравствено ниво, со оглед на тоа што семејните лекари ќе бидат за сите возрасти и за сите болести, заменик-министерот Поповски тврди дека, напротив, ќе се добие поефикасно и поорганизирано здравство. "Ќе се почитуваат медицинските протоколи, а со специјализацијата ќе се едуцираат како подобро да се организираат и да ги насочуваат болните на вистински места", вели Поповски и укажува дека ниту Европа ниту САД не познаваат матични лекари, што е причина повеќе примарното здравство да се преструктурира.