Исчезнатата кичевка пронајдена искасапена

Седумдесетгодишна кичевка е пронајдена мртва во близина на новата болница во Кичево. На нејзиното тело биле пронајдени 25 убоди од нож. Кој и зошто ја убил 70-годишната Верица Крстеска, која пред неколку дена беше пријавена за исчезната - се' уште не се знае. Ова злосторство ги исплаши кичевци, потсетувајќи ги на серијата убиства во овој град, во кој жртви беа возрасни жени.

Телото на Крстеска, кое било во фаза на распаѓање, било забележано од полициска патрола завчера околу 12,30 часот во напуштен објект, кој порано се користел како санитарен јазол на дел од кичевската болница.

„Од извршениот увид и обдукцијата врз телото, констатирано е дека смртта настанала по насилен пат со убоди од остар предмет. Според обдукцискиот наод, станува збор за 25 убоди“, соопшти МВР.

Според истражен судија од Гостивар што го води случајот, раните биле по вратот, градите и по стомакот, пренесе МИА. Крстеска последен пат била видена во саботата наутро кога го фрлала ѓубрето во контејнер и заминала на пазар. Нејзиниот син и преку медиумите бараше помош, надевајќи се дека мајка му е жива и здрава. Како што објавија медиумите, семејството Крстески е социјален случај и живее во сиромаштија.

Овој случај ги разбуди сеќавањата на неколкуте убиства на возрасни жени што се случија изминатите години во овој град. За серијата убиства, полицијата го осомничи новинарот Владо Танески, но тој, под мистериозни околности, беше пронајден мртов во кофа со вода во тетовскиот затвор. (Г.А.)