Белград нe се сели од туѓите амбасади

Македонија и другите четири наследнички чекаат четири година да го земат својот дел од 44 поделени амбасади

Тамара Грнчароска

До крајот на годинава Македонија требаше да ги преземе во своја сопственост четирите амбасади што ги доби во првиот круг од распределбата на имотот меѓу сукцесорите на поранешна СФРЈ. Амбасадата во Канбера, зградата на Генералниот конзулат на Југославија во Цирих, станот во Рим од 300 квадратни метри и поранешниот конзулат во Атина се објектите што ги доби Македонија од 44 објекти, кои уште во 2006 година ги поделија шесте поранешни републики како наследство. Но, Белград, кој дотогаш ги користеше зградите како свои дипломатски претставништва, продолжи да го прави тоа и по распределбата, што го развлече процесот на сукцесија.

Србија мора да напушти уште 24 од 44 објекти, но бидејќи не го прави тоа, нашата држава и Словенија поднесоа иницијатива за забрзување на овој процес и за договарање на конкретен датум за предавање на амбасадите, на која се приклучи и Хрватска. Во мај беше договорено да се одржи состанок на Мешовитиот комитет во јуни, но беше одложен по барање на Белград. Српската страна, како што информираат извори од МНР, во своето објаснување навела дека не била подготвена за примопредавање, бидејќи владата се' уште не дала согласност за тоа, со образложение дека нема пронајдено замена за зградите на амбасадите што треба да ги напушти.

Србија, како решение на настанатата состојба и притисокот да ги предаде објектите, деновиве понуди земјите наследнички заеднички да ги користат зградите на амбасадите, со што би имале помали трошоци. Со тоа Србија би избегнала изнајмување или купување нови објекти за амбасади, токму она на што досега беа принудени останатите пет држави. Од македонското МНР вчера како одговор на предлогот на српскиот претседател Борис Тадиќ, рекоа дека „тој се' уште се разгледува“.

Иако во 2001 е потпишан Генерален договор меѓу државите наследнички каде што во вториот анекс се опфатени дипломатските претставништва, досега ниту една земја не успеа да преземе во свое власништво ниту една од зградите, бидејќи примопредавањето на досега прераспределените 44 треба да се изврши наеднаш. Амбасадата во Париз, која Македонија ја доби во владеење, е надвор од оваа група, поточно сите земји-наследнички зедоа по една амбасада пред да почне поделбата на преостанатите над 120 дипломатски претставништва на СФРЈ низ светот.

„Зградата во Канбера и станот во Рим се ослободени од страна на Белград, но Договорот не дозволува билатерално преземање на објектите. Чекаме сите згради да бидат ослободени“, информираат извори од македонското МНР.