ГЕМ го праќа Ставрески да учи латино танци

Вицепремиерот обвини дека ГЕМ е сдсмовска инсталација, со што испровоцира жесток одговор од оваа НВО

„Со ’Надеж‘ се поставени темелите на движењето „Граѓани за европска Македонија“. Со оваа стратегија се покажа дека ГЕМ не е невладина организација или иницијатива“. Со вакви обвинувања настапи вицепремиерот Зоран Ставрески на прес-конференција на ВМРО-ДПМНЕ, посочувајќи дека ГЕМ е „партиска сдсмовска инсталација во невладиниот сектор“.

Од ГЕМ вчера демантираа поврзаност со СДСМ. Според Жарко Трајановски, држава во која активисти за човекови права се прогласуваат за државни непријатели, сериозно треба да се замисли за својата иднина.

„Партија што се служи со гебелсовски методи не е демократска, туку е фашистичка партија“, рече тој.

Роберто Беличанец посочи дека ГЕМ никогаш не криеле дека се против политиката на актуелната власт, но дека тоа не значи дека станува збор за инструментализирана иницијатива. „Етикетирањето има цел да се редуцира македонската политичка сцена само на двете најголеми партии, затоа што така полесно се манипулира со граѓаните“.

Бранко Геровски му порача на Ставрески дека за неговата кариера би било побезболно да се обиде да се дефрустрира на попогоден начин, на пример, да вежба латинотанци или пилатес.

„Партијата-фамилија не размислува политички, туку маркетиншки. Тие, всушност, не ни мислат освен како да се лаже народот, а реалноста да се спинува. Затоа не сме рамноправни, ГЕМ и ДПМНЕ“, нагласи Никола Гелевски.

Ставрески посочи и дека во стратегијата „Надеж“ е поставена и идејата за формирање „разно-разни архибригади, „Плоштад слобода“, распеани скопјани и слични организации на неколкумина млади активисти на СДСМ.

Од „Плоштад слобода“ преку писмената реакција ги отфрлија наводите за диригираност на нивните акции како неточни и побараа од Ставрески или да ги докаже наводните врски во стратегијата на поранешниот претседател или да се извини за нарушување на нивниот углед. Тие го повикуваа и СДСМ да ги демантира наводите за врски меѓу нивната стратегија и дејствувањето на овие организации и независни активисти.

Социјалдемократите по изјавата на вицепремиерот, реагираа дека „на ВМРО-ДПМНЕ мора многу да и' гори под нозе штом одлучиле да го жртвуваат Ставрески и да го натераат да држи срамни прес-конференции, полни со омраза и очај. „СДСМ и натаму најжестоко ќе се бори против оваа одродена власт и притоа ќе ги впрегне сите општествени сили, кои автентично се борат за истата цел“, реагираа од СДСМ.

Вчера се огласи и Здружението „Правда за сите“, кое обвини дека „Граѓани за европска Македонија“ е партиска инсталација и организација на СДСМ финансирана од „Сорос“, која го урива кредибилитетот на сите невладини организации во Македонија“. (П.Р.)