Бизнисмените од Велес бараат поврат на ДДВ-то
Велешките стопанственици завчера и' се пожалија на Владата дека им доцни повратот на ДДВ-то во последните месеци. На завчерашната средба што ја имаа со министерот за економија Фатмир Бесими, на нивните поплаки тој им одговорил дека проблемот ќе го пренесе до Владата и до надлежните институции, но дека, најверојатно, станува збор за пропусти во некои бирократски процедури. Бесими ги информирал стопанствениците од Велес за најновите мерки на Владата за ублажување на последиците од глобалната криза врз македонското стопанство.
Според него, продажбата на велешка Топилница е регуларно спроведена и од новите газди ќе зависи дали таа ќе биде рестартирана. „Продажбата е спроведена според укажувањата на доверителите и стечајниот управник само го направил тоа што се барало од него“, рече Бесими, додавајќи дека Министерството за економија нема директна надлежност да укаже на постапката, како и тоа дали да се рестартира Топилница или не. Инаку, најголем процент на велешани се против рестартот на Топилницата. Тие имаат упатено жалба до надлежните министерства, меѓу кои и до Министерството за економија за нерегуларната и скандалозната продажба на Топилница и бараат преиспитување на постапката. (МИА) |
