Македонски лекари ќе учат кинеска алтернатива

Во наредните шест месеци Македонија и Кина ќе работат на акционен план за размена на искуства во областа на реформите во здравството и за обука на медицински персонал и на експерти од Македонија за кинеската традиционална медицина. Со овој план се интензивира соработката меѓу двете држави воспоставена пред неколку години од ексминистерот Владо Димов со потпишување на Спогодбата за унапредување на с��работката во здравството и во областа на традиционалната медицина.

„Договоривме и соработка меѓу болници преку твининг-програми, како и меѓу медицинските факултети во двете држави“, изјави министерот за здравство, Бујар Османи.

Неговиот колега Чен Џу рече дека се согласиле да ги унапредат програмите за размена на здравствени работници и институции во областа на медицината, едукацијата, обуката на општи лекари и здравствената политика, а се заинтересирани и за развивање и истражување на традиционалната медицина.

Државната администрација за храна и лекови во Кина има над 4.000 традиционални кинески лекови што се користат во нивната медицина, а се употребуваат и во земјите од ЕУ и во Македонија. (Ј.Ј.)