Виножито испровоцирано од антимакедонски слоган
Реакција на содржината на повикот упатен од грчката Национална гарда за одржување воена вежба во Лерин
Виножито, партијата на Македонците во Грција, вчера со соопштение реагираше на содржината на повикот упатен од грчката Национална гарда за одржување воена вежба во Лерин, во кој е наведено дека „Македонија е една и грчка“. Оваа реченица од повикот доаѓа од официјална институција на грчката држава и претставува флагрантна и невидена провокација против суверената држава Република Македонија, чии граници се само 20 километри од местото каде што се одржа вежбата, оценува Виножито. Тоа, според партијата, е уште еден доказ за лицемерството на Грција која, ја обвинува Македонија за иредентизам, а постојано спроведува иредентистички политики и поттикнува провокативни активности. „Се прашуваме дали слоганот ’Македонија е една и грчка‘, промовиран од владата и Армијата на Грција, ќе биде користен за напад на Македонија во случај на нестабилност на Балканот“, се вели во реакцијата. Виножито. Со жалење се заклучува дека Грција нема никогаш да прифати постоење на македонски народ внатре или надвор од своите граници се' додека не биде принудена да го направи тоа. (П.Р.) |
