Закажи-откажи расправа во Собранието за А1

Светлана Унковска

Анкетната комисија за заштита на слободата и правата на граѓаните не успеа да ја отвори расправата за случувањата на улицата „Перо Наков“ б.б. од пред десетина дена. Пратениците од ВМРО-ДПМНЕ побараа седницата на комисијата да се одложи поради тоа што во исто време почна и собраниска седница, на чиј дневен ред имало важни точки за кои е потребно двотретинско мнозинство. Претседателката на Анкетната комисија, Весна Бендевска, се согласи и седницата ја презакажа за денеска во 11 часот, но и ова не беше прифатливо за пратениците на владејачката ВМРО-ДПМНЕ на кои не им се допадна да доаѓаат во сабота во Собранието и поради тоа демонстративно ја напуштија седницата. Малку подоцна Бендевска, преку соопштение, ја одложи и оваа седница, бидејќи не успеала да обезбеди присуство од министерката за внатрешни работи, Гордана Јанкулоска. Таа, како и директорот на Финансиска полиција, Љупчо Стаматовски, вчера не се појавија на седницата на Анкетната комисија.

На вчерашната седница опозицијата обвини дека владејачката партија сака да ја одбегне расправата и дека за тоа има сценарио со претседателот на Собранието, Трајко Вељаноски. Тој претходниот ден закажал собраниската седница, иако петок е ден кога не се одржуваат седници и тогаш пратениците имаат можност за други обврски.

Атмосферата со меѓусебните препукувања на моменти се вжешти до таа мера што Јани Макрадули од СДСМ им се обрати на пратениците од ВМРО-ДПМНЕ и им порача дека за овој извештај, веројатно, наскоро ќе расправа ново мнозинство, додека Цветко Грозданов од ВМРО-ДПМНЕ ја обвини Бендевска дека нема капацитет да ја води Комисијата, дека манипулира и ја злоупотребува позицијата и поради тоа треба да ја напушти оваа функција. Сето ова го следеа голем број професори, претставници на невладиниот сектор, експерти за човекови права и новинарите на А1, кои на 25 ноември беа директни актери во случувањата.

Главниот уредник на „Шпиц“, Бранко Геровски, ни изјави дека за него било очекувано ваквото презакажување на седницата. „Мислам дека ќе продолжат напорите на владјеачкото мнозинство да ја одложува дебатата за ова исклучително прашања, барем додека не легнат малку работите. Според мене, битно е со или без владејачкото мнозинство што поскоро да се отвори дебатата, затоа што на македонската јавност треба да и' се соопшти за тоа што се случи. Геровски останува на ставот дека вечерта во А1 имало полициски упад, иако сопственикот на телевизијата, Велија Рамковски, во интервјуто за Алсат-М, во ниту еден момент не спомна дека се работи за упад.

Инсистирањето да се одложи расправата опозициските пратеници го оценија како одбегнување на власта да се соочи со настаните пред А1.

Професорката Гордана Силјановска од Правниот факултет предложи на наредната седница да се инсистира на присуството на министерката Јанкулоска и на директорот на Финансиска полиција, како клучни фигури за расветлување на настаните од 25 ноември. Поранешната судијка во Европскиот суд за човекови права, Маргарита Цаца Николовска, пак, забележа дека од писмените извештаи за постапувањето на Финансиската полиција и МВР не се гледаат причините врз основа на што реагирале и која е легитимната цел на таквата интервенција.