Учениците - Македонци се враќаат на настава
Охрид – Учениците-Македонци, кои четири недели ја бојкотираа наставата со барање за воведување јазични смени во училиштата „Нико Нестор“ и „Ибрахим Темо“ во Струга, в понеделник ќе се вратат на настава.
Ова беше одлучено во саботата, откако Владата и градските власти на Струга на родителите и учениците им ветија дека брзо ќе излезат со финално решение за проблемот. „Се договоривме до 13 октомври да излеземе со конкретни решенија за проблемот, со тоа што учениците од понеделник ќе почнат редовно да си ја следат наставата без притоа да губат часови“, изјави по средбата министерот за образование, Перо Стојаноски.
Покрај него, на средбата со родителите и средношколците присуствуваа и вицепремиерот Абдулаким Адеми, министерот за труд и социјална политика, Бајрам Џелали, градоначалникот Рамиз Мерко и директорите на средните училишта „Нико Нестор“ и „Ибрахим Темо“.
Родителите на учениците-Македонци и натаму инсистираат на воведување јазични смени со што, според нив, ќе се избегнат инцидентите како во минатата учебна година по кои започна бојкотот на наставата. Според надлежните, клучен проблем за решавање на проблемите во средношколскиот центар во Струга е немањето просторни услови за нормално следење на наставата. (Макфакс) |
