Насловна

Александар Велики на балканска турнеја, ќе дојава во Литохоро

Скулптурите на Александар Македонски, се чини, ја почнаа балканската турнеја. По „Воинот на коњ“ во Скопје, почнаа да се шират гласишта дека следниот воин ќе се исправи во Атина поради притисоците од пратениците на десницата, но, сепак, новиот Александар во Грција летово ќе никне на патот кон Катерини и Литохоро, познато гратче под Олимп.

Овој споменик на Александар Македонски е подарок од лидерот на ултрадесничарската партија ЛАОС, Јоргос Караџаферис за општината Дион-Литохоро и за фондацијата „Александар Македонски“, која се наоѓа во овој дел. Од канцеларијата за печат на ЛАОС потврдуваат дека свеченото откривање на споменикот ќе биде на 29 јули во дворот на зградата на Фондацијата, која се на��ѓа на патот за Литохоро, во регионот Пиерија каде што се наоѓаат голем дел од популарните летувалишта, како што се Катерини, Неи Пори и Лептокарија.

Караџаферис ја најави пинг-понг играта со споменици во октомври минатата година на средба со градоначалникот на регионот Јорго Папатанасиу, забележувајќи дека ова е порака до Скопје дека во Грција се' уште има луѓе што не се откажуваат од својата историја. Како што пишува Караџаферис во својата порака за споменикот-подарок (за кој грчките медиуми шпекулираа дека првично лидерот на ЛАОС сакал да го постави во една од атинските населби), овој споменик е дело на грчкиот уметник и професор Константинос Палеологос. Скулптурата е висока седум метри, направена од бронза со внатрешен челичен скелет и како што се вели во излагањето на Караџаферис, изработена е по пример на скулптурата на Александар во Александрија, Египет.

Иако се познати димензиите и скулпторот, се' уште нема јавно информација колку пари од свој џеб издвоил Караџаферис за овој споменик - подарок за Фондацијата и регионот Пиерија. (Н.Р.)