Насловна

Унгарија предлага прво преговори, па името

Будимпешта - Треба да продолжат напорите за изнаоѓање заедничко прифатливо решение за спорот за името. Ова не е интелектуално прашање што може кој  било да го реши со креативна мисла, туку е политичко прашање и решението мора да биде во интерес на двете страни, истакна унгарскиот министер за надворешни работи, Јанош Мартоњи, на вчерашната средба во Будимпешта со новинари од земјите од Западен Балкан. 

Мартоњи посочи дека од македонската и од грчката страна постојано во последните неколку месеци добива информации дека денот за изнаоѓање на решението за името се наближува.

„Преговорите се одвиваат со посредство на ОН. Ниту ЕУ ниту Унгарија не можат повеќе да направат освен да ги охрабруваат двете страни да ��о изнајдат заеднички прифатливото решение“, рече Мартоњи, одговарајќи на новинарски прашања.

Тој потенцира дека како член на ЕУ Унгарија има ист став со Европската комисија и со Европскиот парламент дека преговорите со Македонија би можеле да започнат без решавање на прашањето за името, со тоа што повеќе од јасен е фактот дека преговорите ќе се затворат само доколку се изнајде решение за спорот.

„Ние не гледаме пречка за почнување на преговорите порано, но во исто време сме реалисти и поради тоа не го ставивме ова прашање како точка на дневен ред. Сметавме дека на дневен ред може да се најдат само такви прашања чија веројатност за добивање одговори е поголема“, додаде Мартоњи. (МИА)