Што прават денеска

Зоица Пуровска

дир. на КЕЦ „Сцена“

Покрај редовните обврски во нашиот културно-едукативен центар, особено сум сконцентрирана на подготовките на ќерка ми Ангела за нејзино учество во интернационалната балетска група „Кроација“, со која треба да игра во неокласичната „Оревокршачка“. На 5 ноември заминуваат за Мексико, каде што ќе одиграат 11 претстави, а денеска работиме еден вид генерална проба на нејзината улога.

Александар Димитровски

дир. на ФФ „Роса“

Во интензивна комуникација сум со дел од македонската фолк-естрада, која ќе настапи на 11. издание на фестивалот „Роса“, што годинава ќе се одржи на 26 ноември. Имам намера годинава фестивалот да го освежам со некои нови концепциски идеи, за поголема и посовремена афирмација на македонската народна музика.

Зоран Љутков

актер

Овој период ми е без некои поголеми обврски за улогите, па го користам да почнам со подготовките на идното 10. издание на Фестивалот на античка драма „Стоби“. Во тој контекст денеска имам неколку состаноци. Добро е со време да се почнат подготовките, со оглед на тоа дека не' очекува јубилеј.