Струмица и Василево се скараа за ѓубре

СТРУМИЦА - Општините Струмица и Василево се скараа за ѓубре. Првпат по дваесет и осум години, Струмица остана без депонија и нема каде да го фрла отпадот. Депонијата „Шапкар“ кај Добрашинци вчера беше затворена за камионите на струмичкото комунално претпријатие.

Градоначалникот и администрацијата на Општина Василево забранија истурање на сметот од градот, поради несовесно стопанисување со депонијата и непочитување на спогодбата што ја потпишале двете општини во 1997 година. Поради овие причини, Советот на Општина Василево на 27 јуни годинава донел одлука со оваа депонија да управува комуналното претпријатие на Василево, а не струмичкото комунално претпријатие кое со депонијата стопанисува од 1982 година.

„На ваков чекор се одлучивме бидејќи ‘Комуналец‘ од Струмица не исполни ниту еден од условите во спогодбата“, вели Ванчо Стојанов, градоначалник на Општина Василево.

И струмичкиот градоначалник дојде да го види хаосот со отпадот кај Добрашинци. Според него, одлуката на Општина Василево е незаконска, несовесна и неморална, бидејќи да се блокира депонија среде лето, на високи температури значи опасност од епидемии и зарази.

„Го повикувам колегата градоначалник да ја повлече одлуката зашто ако не можеме да го депонираме сметот, автоматски не можеме ниту да го собираме од граѓаните и тоа е многу опасно на високи температури. Такво нешто нема да дозволиме“, предупреди Зоран Заев. Според него, општините ниту можат да одземат ниту да доделат локации за каква било намена, а посебно не за депонија. Заев вели дека за тоа се надлежни државните институции, а дека струмички „Комуналец“ ја управува депонијата од 1982 година, со комплетна документација.

Двајцата градоначалници договорија средба на која ќе се обидат да го решат проблемот со депонијата. На истото место е планирана современа регионална депонија што ќе го собира отпадот од десетте општини на југоисточниот плански регион.

Министерството за животна средина води постапка за избор на концесионер што ќе ја управува регионалната депонија кај Добрашинци. Досега се пријавиле осум фирми од пет држави. (Е.П.)