Попуштија столбовите, „Космос“ се искриви

Љубиша Станковиќ

По цели осум дена како што се започна со уривање на станбено-деловниот центар „Космос“, дури вчера попуштија носечките столбови и објектот се накриви. Сепак, и покрај тоа што објектот е пред самоуривање, и вчера можеа да се забележат многубројни работници што се ангажирани за уривање на „Космос“, кој, пак, и натаму е обезбедуван од редовниот состав на полицијата, но и од специјалните единици на МВР.

„Имаме одредени сознанија дека се носат експерти за поставување експлозив од Србија. Со експертите за минирање од Србија била донесена и опрема која ќе се користела при уривањето, овој пат, наводно, на вториот објект. Не знаеме да кажеме с�� сигурноста дали и овој објект ќе се минира, но се' упатува на таков заклучок“, вели скопската адвокатка Бранка Атанасовска, правен застапник на Фијат Цаноски. Атанасовска не можеше да каже ништо повеќе за кривичната пријава која против Цаноски ја поднел градоначалникот на Општина Гази Баба.

„Разбравме од медиумите дека е поднесена некаква кривична пријава, но не слушнавме за кое кривично дело се однесува таа пријава. И ние поднесовме кривична пријава за градоначалникот со која го товариме за сторена злоупотреба на службената положба и овластување и за фалсификување исправа“, изјави адвокатката Бранка Атанасовска и појаснува дека реакцијата на Општината, најверојатно, е резултат и одговор на ангажирањето и на американскиот адвокат Дејвид Серџи, но и на формирањето поголем адвокатски тим што ќе ги застапува интересите на фирмата „Фине“ и на нејзиниот сопственик Фијат Цаноски.

Од тимот на Цаноски потврдуваат дека американскиот адвокат Дејвид Серџи, како што тој и самиот вети, веќе поднел барање до Судот во Стразур за изрекување привремена мерка со која ќе се бара запирање на уривањето на „Космос“.

Сознанијата до кои дојде „Утрински весник“ говорат дека Цаноски интензивно работи на заштита на својот имот и дека за таа цел врши екипирања. Според непотврдени информации, тој во текот на вчерашниот ден, наводно, остварил средба со Јорго Шундовски. Ваквите шпекулации не се без основа, бидејќи како творец на основниот проект за станбено-деловниот објект „Космос“ се јавува токму поранешниот министер Шундовски и неговото архитектонско-проектантско биро.

За случајот со комплексот „Космос“ вчера со свој став требаше да се огласи и Општина Гази Баба и нејзиниот градоначалник Тони Трајковски, но најавената прес-конференција е одложена и е презакажана за денеска.

Како причина за одложување на закажаната средба со медиумите портпаролката на Гази Баба, Емилија Кипровска, ја наведе недокомплетираната документација што планирале да ја презентираат, а се однесува на случајот со „Космос“.