Претходен број

Фармерите ги миеја улиците со свежо млеко 

Млекопроизводителите бараат стандардизација на просечната откупна цена на 29 денари

Александар Пешев

Фармерите вчера го раздаваа и го истураа свежото млеко во знак на протест поради ниските откупни цени. Млекопроизводителите бараат стандардизација на просечната откупна цена на 29 денари, со тоа што најнискоквалитетното млеко би се откупувало за 24 денари за литар, додека за најквалитетното млеко фармерите би добивале по 32 денара од литар. Доколку се прифати барањето, млекопроизводителите сакаат ретроактивна исплата на разликите во цената на млекото за јуни, јули и август годинава. Тие тврдат дека досега цените се одредувале од рака. Во одредени случаи, дури и за чисто млеко со добар квалитет, без додадена вода, добивале од 10 до 13 денари за литар. Фармерите се правдаат дека со ваквите цени протестите им останале единствена можност.

„За почеток сакаме да покажеме дека нашата намера е јасна. Досега не реагиравме, но принудени сме на тоа“, изјави на вчерашниот протест пред млекарницата „Сведмилк“ фармерот Мурсили Сифириу.

Инаку, фармерите кои вчера се собраа пред оваа млекарница дел од свежото млеко го истурија пред влезот на странскиот инвеститор, додека дел им го поделија на минувачите.

Од денеска ситуацијата во Скопскиот и во Кумановскиот регион ќе се смири. Млекарите повторно ќе можат да се обратат кај фармерите за откуп на свежо млеко.

„Ако ситуацијата не се промени до 28 август, тогаш ќе организираме поголеми и помасовни протести со блокирање патни правци и блокирање на сите камиони на млекарниците“, потврди Сифириу.

Слична беше состојбата на повеќе места во земјава. Фармерите од западниот дел на Македонија, од Тетовско до Кичевско, вчера организираа предупредувачка сообраќајна блокада на автопатот Скопје - Тетово кај наплатната рампа Желино. Иако беа блокирани двете коловозни ленти, сообраќајот сепак се одвиваше со пренасочување кај јазлите Желино и Групчин по стариот пат. Над стотина млекопроизводители ја поставија блокадата со трактори, автомобили и канти со млеко. Јавниот револт на крајот беше искажан со истурање на млекото на автопатот.

Патиштата беа блокирани и во Пелагонискиот регион. Неколку стотици пелагониски фармери со трактори и друга земјоделска механизација ги блокираа патиштата во индустрискиот дел на Битола пред големите млекарници ИМБ и „Идеал шипка“ како предупредување да ја променат откупната политика. Десетици канти со мл��ко демонстративно беа истурени на улиците и каналите.

„Последните недели цената ја спуштија од 30 на неверојатни 10 денари за литар. Ни велат дека млекото што го предаваме не е квалитетно. Ако е така. нека не го откупуваат. Нека го вратат. Ама тие го купуваат. Ова е само лоша игра на млекарниците. Должат пари со месеци, но молчат. Кога ќе го платат долгот“, прашува Душко Илиевски, млекопроизводител од Битола.

Фармерите велат дека ако наскоро не се стабилизира откупната цена на млекото, млекопроизводството ќе стане нерентабилна сточарска гранка. Во таков случај, излезот го гледаат во намалување на сточниот фонд, со масовен колеж на кравите. Дел од фармерите се жалат дека млекарниците упорно инсистираат на имплементација на современи стандарди при млекопроизводството, за што фармерите велат дека немаат пари.

Од млекарниците експресно реагираа на забелешките на фармерите, тврдејќи дека нивните напори за имплементација на европските стандарди во млекопроизводството се отежнати од квалитетот на домашното млеко и постојаните барања за повисока откупна цена.

Здружението на преработувачите и производителите на млечни и месни производи тврди дека во земјите на Европската унија просечната цена за откуп на млеко е 35 евроценти или приближно 21,5 денари за литар млеко кое е произведено според европски стандарди. И тоа со 4,2 отсто млечни масти и 3,4 отсто сиров протеин со помалку од 24,999 бактерии.

„Квалитетот на македонското млеко ни оддалеку не ги исполнува овие критериуми. Македонското откупно млеко кое ги исполнува ЕУ-стандардите има повисока откупна цена од онаа во европските земји“, се наведува во соопштението на Здружението за медиумите.

„Во такви услови, целосно неосновани се обвинувањата дека млекопреработувачите во Македонија функционираат против своите кооперанти, имено фармерите. Во услови на пазарна економија, квалитетот е тој што ја одредува цената на еден производ“, се додава во дописот.



(Во изработката на текстот учествуваа и дописници на „Утрински весник“)