Во прилепската болница повторно ќе се вршат породувања

Со речиси целосната реновација се зафатени подот, опремата, работните површини...

ПРИЛЕП - Државниот санитарен и здравствен инспекторат даде зелено светло за санацијата на прилепското Акушерско-гинеколошко одделение, па од денеска родилките ќе можат да се породуваат во прилепската болница. Како што истакнуваат од Инспекторатот, извршена е целосна замена на подот во Одделот за породување, набавена е нова опрема, работни површини од ростфрај, а набавени се и нови душеци за родилките. Освен тоа, извршена е дезинфекција на целиот оддел, а резултатите на 57 брисеви се негативни, што значи не е изолирана никаква бактерија на ова одделение.

„Со записник констатиравме дека се исполнети сите мерки, одделението може да почне со редовна работа“, истакна д-р Вера Менковска.

Бактерија во Гинеколошкиот оддел не беше изолирана ниту во земените мостри по трагичните случаи кога три родилки го загубија животот.

Се' уште се чекаат резултатите од Институтот за судска медицина, кои треба да покажат кои се причините за смртта на последната, 32-годишната Јасмина Богданоска, која почина пред два месеца кога беше издадена забрана за породување на овој оддел.

„Кога ќе ги добиеме резултатите од истрагата - ќе ги соопштиме“, изјави Илија Богатиноски, директор на болницата.

Но, во Гинеколошкото одделение и натаму останува проблемот со кадровската екипираност.

„Моментално функционираме петмина гинеколози, кои за скоро време треба да се пензионираат. Перспективно имаме неколку колеги и колешки што се на специјализација и кои ќе ги заменат колегите што заминуваат во пензија. Но, сепак, недостасуваат уште петмина гинеколози за нормално функционирање на овој оддел“, истакна д-р Снежана Јакимоска, началник на Гинеколошко-акушерскиот оддел.

Од друга страна, и натаму се евидентни санитарно-хигиенските проблеми на прилепската болница.

Според најавите на директорот Богатиноски, до крајот мај ќе започнат градежните работи за целосна санација на објектот.

„Во реконструкција на Гинеколошкото одделение се инвестирани околу три милиони денари, а со средства од Светска банка преку Министерството за здравство ќе се изврши реконструкција на целиот објект. Со оваа инвестиција се опфатени сите санитарни јазли, сите вертикални и хоризонтални одводи, замена на дограмата, изградба на станица за централни плински гасови и што е најважно, ќе профункционира новиот ургентен центар“, вели Богатиноски. (Мн.Т.)