Македонец брутално претепан во Бугарија

Педесет и осумгодишен македонски државјанин се бори за живот откако немилосрдно бил претепан во бугарскиот град Петрич. Како што известуваат бугарските медиуми, станува збор за Томе Тонев, кој вчера изутрина со тешки повреди бил примен во Медицинскиот центар во Петрич. Последните информации се дека едно лице е приведено од страна на бугарската полиција поради сомнение дека учествувал во претепувањето на македонскиот државјанин.

„Томе Тонев (58) е во животна опасност и се наоѓа на реанимација во болницата во Благоевград откако завчера вечер бил претепан во Петрич“, јави бугарската агенција Бгнес.

Тонев бил примен вчераутро во Медицинскиот центар во Петрич околу 6 часот. Лекарски извори за агенцијата изјавиле дека тој се наоѓа во многу тешка состојба, со черепно-мозочна траума, мозочен хематом и голема загуба на крв.

„По консултациите со лекарот, било констатирано дека Тонев нема да го издржи транспортот до Институтот „Пирогов“ во главниот град. Поради тоа бил примен во Одделението за реанимација во Благоевград“, јавуваат бугарските агенции. Според нив, едно лице е приведено под сомнение дека е извршител на нападот.  (Х.Р.)