Мистериозно повлекување на Мартин Протоѓер

Се осипува групата лојалисти околу премиерот Груевски

Светлана Унковска

Мартин Протоѓер, верна сенка на премиерот Никола Груевски, минатиот петок летна за Хрватска каде што го минува летниот одмор, игнорирајќи ја поканата за состанокот на Централниот комитет и оставајќи му на својот шеф куса оставка на местото генерален секретар на ВМРО-ДПМНЕ. Позиција, која во услови кога една партија е на власт а нејзиниот лидер го држи премиерското место, е рамна на лидерска позиција.

Така, сосема тивко една од најзначајните фигури во ВМРО-ДПМНЕ со една нога ја напушти групата лојалисти на Груевски каде што по заминувањето на Антонио Милошоски останаа само Зоран Ставрески и Гордана Јанкулоска. Велиме со една нога затоа што Протоѓер, сепак, останува да ја врши функцијата шеф на Кабинетот на премиерот Груевски што, само по себе, е индикатор дека барем засега не може да се говори за судир меѓу нив двајца.

Официјалното објаснување за повлекувањето на Протоѓер се здравствени причини. На негово место е поставен Кирил Божиновски, генерален секретар на Владата. Ваквата одлука е донесена на завчерашната седница на Централниот комитет на партијата, која воедно го избра и новото членство на ИК.

Протоѓер, како што велат извори од партијата, сам побарал од претседателот на партијата, Никола Груевски, да го напушти кормилото на Извршниот комитет веднаш откако неговиот лидер, кој по функција е и претседател на ова партиско тело, објавил дека сака да направи одредени кадровски промени.

Протоѓер останува да ја врши функцијата шеф на Кабинет на премиерот Груевски, а во Извршниот комитет на ВМРО-ДПМНЕ во наредниот мандат ќе биде само член. Смената во врвот и на членството на партиското тело, кое во наредните четири години ќе брои помалку членови, доаѓа само неколку дена по изборот на новата Влада, но се случува пред да им истече мандатот.

Заминувањето на Протоѓер од оваа позиција, која, всушност, значи десна рака на лидерот на партијата, отвора многу дилеми, но и буди уште повеќе шпекулации. По откажувањето на министерот за надворешни работи, Антонио Милошоски, да продолжи да ја води македонската дипломатија, сега заминува и Протоѓер, двајцата лојални личности од првиот круг на најблиското опкружување на премиерот.

Сепак, во услови кога претседателот на партијата е и претседател на Владата и кога практично нема можности да им се посвети на партиските обврски, целата работа и одговорност паѓа на товар на генералниот секретар. Затоа и повлекувањето на Протоѓер, кој важи за верна сенка на Груевски, но и значајна фигура што досега практично ги влечеше сите конци во партијата, е исклучително чуден потег, а уште повеќе што функцијата му се препушта на личност што во партиската и во политичката сфера е тотален анонимус.

Во ВМРО-ДПМНЕ владее спокојство по оваа безмалку сензационална вест, но дали е вистинско или лажно, е друго прашање. Директорот на партискиот Центар за комуникации, Илија Димовски, не се согласува дека за нив Божиновски е непозната личност.

„Точно е дека јавноста многу малку знае за него, но тој е долго време во партијата и извршува одговорни функции. Воедно тој му е близок соработник и на досегашниот генерален секретар, Протоѓер, но тоа што досега не бил експониран не значи и дека не може да ја врши оваа одговорна партиска функција“, ни изјави Димовски.

И покрај ваквите уверувања, сепак, останува дилемата зошто на ова место не се именувани личности што се многу активни и секогаш се на истурените позиции во партијата. Можеби, понормално ќе се доживее промената ако таму се најдеше Димовски, или, пак, некој од сегашните министри, кои се само членови на Извршниот комитет на владејачката партија. Симптоматично е што тука го нема ниту Влатко Ѓорчев, кој не само што не го перцепираат како одговорен за оваа позиција, туку воопшто не е ниту негов член.

Во ВМРО-ДПМНЕ немаат објаснување зошто Протоѓер не го заврши четиригодишниот мандат како генерален секретар што му припаѓа според партискиот статут, туку се повлече само по три години. Во неговото партиско досие ќе остане зебележано дека беше на чело на изборниот штаб на ВМРО-ДПМНЕ четири пати и тоа во 2006, 2008, 2009 и во 2011 година и притоа на сите избори партијата однесе триумфална победа.

Новиот Извршен комитет на ВМРО-ДПМНЕ

Во новиот состав, покрај Божиновски како генерален секретар, заедно со Протоѓер, членови ќе бидат Зоран Ставрески, Владимир Пешевски, Гордана Јанкулоска, Сашо Мијалков, Никола Тодоров, Антонио Милошоски, Силвана Бонева, Илија Димовски, Марјан Ристевски, Коце Трајановски, Ивица Коневски, Александар Николовски, Крсто Муковски, потоа претседателката на Унијата на жени на ВМРО-ДПМНЕ, Даниела Караѓозова, и на Унијата на млади сили, Диме Спасов.

Кој е Божиновски, наследникот на Протоѓер

Новиот генерален секретар на Извршниот комитет на ВМРО-ДПМНЕ, Кирил Божиновски, е воедно и генерален секретар на Владата. И тој, како и досегашниот висок партиски функционер Мартин Протоѓер, ќе извршува две функции, една во Владата и една партиска. Божиновски е речиси непозната личност во јавноста, но познавачите на состојбите во партијата велат дека тој е личност кој, за разлика од Протогер, одамна е во ВМРО-ДПМНЕ, уште од времето на Љупчо Георгиевски и одлично ги познава состојбите во партијата. Изборот на Божиновски за оваа партиска функција, оценуваат истите извори, е одлично решение не само поради тоа што има партиско искуство, туку и дека има капацитет да се носи со позицијата генерален секретар на ВМРО-ДПМНЕ.

Божиновски, пред да биде именуван за прв човек во Генералниот секретаријат на Владата, од 2007 година работел како раководител на Секторот за меѓународни односи и соработка во Кабинетот на премиерот и тоа заедно со Протоѓер, кому му е близок соработник, но и пријател. Претходно бил советник во Кабинетот на претседате��от на Собранието, Трајко Велјаноски, а има работено и во Општина Гази Баба.

Тој е роден на 24 мај 1980 година во Скопје. Дипломира на Правниот факултет и е магистрант на катедрата по меѓународно право и меѓународна политика на Универзитетот „Свети Кирил и Методиј“. (Св.У.)