Кумановец се изживувал врз момче од Тетово

Уапсен е 27-годишен кумановец, кој го принудувал момчето на орален секс, а потоа го уценувал

Го принудил на орален секс и потоа со снимките што ги направил го уценувал да му даде пари, инаку материјалот ќе го објавел на „Фејсбук“. Оваа тактика 27-годишен кумановец ја применил врз 21-годишен тетовец, кој на крајот го пријавил случајот во полиција. Против кумановецот Х.У. е поднесена кривична пријава поради уцена.

Според МВР, се' почнало минатата среда кога кумановецот му испратил неколку пораки на тетовецот и претставувајќи му се како да се познаваат му закажал средба на старата автобуска станица во Скопје. Откако се сретнале, Х.У. инсистирал двајцата да седнат на кафе, но тетовецот одбил. Кумановецот, како што тврди МВР, му се заканил дека ќе го убие ако не тргне со него, по што двајцата седнале во кафуле во старата железничка станица.

„Кога влегле во барот бил присутен само келнерот, кој од осомничениот бил информиран дека ќе седнат на вториот кат од локалот за да разговараат“, соопшти полицијата.

Штом седнале Х.У. неколку пати го удрил со тупаница 21-годишникот, принудувајќи го на орален секс, а чинот го снимил на мобилниот телефон од тетовецот, кој претходно му го одзел за да ги избрише пораките што му ги испратил. Покрај тоа, му одзел и 2.000 денари, а потоа, под закана дека во појасот има пиштол, го принудил момчето да зајми 3.000 денари од свој другар.

„Откако ги зел парите под присила, со непознато такси-возило го однел во преноќевалиште во населбата Влае, каде што во најмена соба се обидел да изврши обесчестување над него“, покажала истрагата. Кошмарот на момчето продолжил и вечерта кога пред полноќ пешки се упатиле кон Новата железничка станица, каде што повторно го присилил на орален секс. По некое време му се заканил дека доколку до 5 јуни не му даде поголема сума пари или злато, снимениот материјал ќе го пушти на „Фејсбук“.

Минатиот петокот тетовецот го пријавил случајот во полиција. Завчера двајцата се договориле да се видат во ТЦ „Мавровка“ во Скопје. Тетовецот дал 500 евра, а кумановецот му ја вратил мемориската картичка од мобилниот телефон. Штом се разделиле полицајците го уапсиле Х.У, кај кого биле пронајдени обележаните пари. (Г.А.)