Лив Тајлер

Мажите не ја интересираат, само синот

Актерката Лив Тајлер не се занесува многу со романтични состаноци. Откако во 2008 година се разведе од сопругот Ројстон Лангдон, таа е недопрена, а единствен маж во нејзиниот живот е нивниот шестгодишен син Мајло.

„Јас баш и не сум најдобрата личност околу прашањата за состаноци со мажи. Но, ако ме прашате за синот, се' ќе ви раскажам“, рекла гордата мајка Лив на една забава во Њујорк. „Мајло е многу паметен и го викам малиот научник. Не го интересираат играчки, туку предмети, како што се пластични шишиња, со кои може да прави експерименти. Или обична картонска кутија со која може да се забавува со часови и од неа да направи најневеројатни работи. Многу е креативен“, восхитено зборува Лив.

Бидејќи наближуваат божикните празници, и во Лив се буди малото дете, па за тоа вели: „Сосема сум палава! Утрото на Божик се будам во 6 часот и трчам под елката за да ѕирнам во чорапот со дарови. Така се однесував како петгодишно девојче и тоа секогаш ќе го правам!“