Претходен број

ДУИ бара албанскиот да биде службен јазик

Листата за министри од ДУИ е кај мандатарот, додека ВМРО-ДПМНЕ се' уште тактизира околу своите кандидати

Сега треба да се најдат патишта за соработка: најекспонираните пратеници на ВМРО-ДПМНЕ и ДУИ, Бонева и Алити

Оливера Војновска

Демократската унија за интеграции влегува во Владата предводена од десничарската ВМРО-ДПМНЕ со конкретни барања: издигнување на албанскиот како службен јазик во Македонија, статус на борците на поранешната ОНА, признавање на Косово.

Според ДУИ, овие работи се дел од коалицискиот договор што го постигнале мандатарот и претседател на ВМРО-ДПМНЕ Никола Груевски и лидерот на инегративците Али Ахмети. Интегративците, исто така, не се откажуваат ниту од корекции на законите за полиција за употреба на знамињата.

Наспроти ваквите тврдења на ДУИ, ВМРО-ДПМНЕ викендот, промовирајќи ја новата владина коалиција, официјално соопшти дека ќе има мораториум на измените на Законот за полиција и на Законот за симболите, дека донесувањето закон за јазиците ќе биде во согласност со Уставот и Охридскиот договор, а прашањето на жртвите од конфликтот во 2001 да се реши во рамки на постојните закони без носење нов закон.

Во ДУИ официјално не сакаа да коментираат зошто има значајни разлики во изјавите со ВМРО-ДПМНЕ. Но, во неформални разговори со новинарите велат: „Оставете ги да зборуваат како што сакаат. Им дозволуваме да прават така, знаеме дека им е многу тешко“.

Пратеникот Џеват Адеми од ДУИ вчера изјави дека Ахмети и Груевски се договорија за начелните определби и политиката на новата влада.

Во однос на законот за јазиците, Адеми рече дека ДУИ никогаш не се залагала албанскиот јазик да стане втор официјален јазик во Македонија, туку официјален. „Никогаш не сме барале албанскиот да биде втор службен јазик, туку службен. Ние не ги рангираме јазиците“, изјави Адеми.

Според него, Груевски и Ахмети имале усогласени ставови за проблемот со името и признавањето на Косово. „Не можам да си замислам влада која нема да ја приз��ае независноста на Косово“, рече Адеми. „Во начелното договарање, двајцата лидери не разговараа за законите за знамињата и за полицијата, но тоа не значи дека нема да се отворат овие теми. Кој ме спречува мене ако сакам да поднесам таков предлог во Собранието“, им изјави Адеми на новинарите.

Тој повтори дека ДУИ „ќе цели на имплементација на Охридскиот договор со донесување закон за употреба на јазиците, социјално и материјално обезбедување на сите засегнати од конфликтот во 2001 година, добивање датум за почеток на преговорите со Европската унија и влез во НАТО, како и борба со криминалот“.

Инаку, листата за министри од редовите на ДУИ со нивните комплетни биографии веќе е кај мандатарот и инегративците очекуваат Груевски поскоро да го достави предлог-составот на новата влада до Собранието. Од ВМРО-ДПМНЕ неофицијално велат дека тоа ќе биде направено, најверојатно, откако ќе поминат законските измени со кои се овозможува формирање министерство за информатички технологии, а кои се на дневен ред на денешната седница. Со таквите корекции владиниот кабинет ќе има вкупно 15 ресори, од кои според направената поделба ДУИ добива пет и едно вицепремиерско место. Интегративците добиваат и потпретседател на Собранието и три заменички места во извршната власт. ДУИ за министри од своите редови ги предлага Фатмир Бесими - економија, Муса Џафери - локална самоуправа, Бујар Османи - здравство, Џелал Бајрами - труд и социјала, Неџат Јакупи - екологија и Абдулаким Адеми заменик-премиер. Како потпретседател на парламентот се споменува актуелниот координатор на пратеничката група Рафис Алити.

Од редовите на ВМРО-ДПМНЕ во Владата остануваат старите министри, има само две-три нови имиња, но и тие не се непознати за јавноста. Извесно е дека функциите ќе ги задржат: Зоран Ставрески - вицепремиер, Антонио Милошоски - надворешни работи, Трајко Славески - финансии, Миле Јанакиевски - транспорт и врски. Иво Ивановски, најверојатно, ќе биде на чело на новоформираното министерство за информатика. Во Министерството за земјоделство останува и Ацо Спасеноски од Социјалистичката партија. Наспроти прогнозите дека од ресорот правда ќе си замине Михајло Маневски, партиски извори велат дека тој, сепак, ќе истера уште еден министерски мандат. Досегашните државни секретари во министерствата за култура и за образование, Елизабета Канчевска - Милевска и Перо Стојановски, се споменуваат како идни министри во овие два ресора.

ДПА вчера не се појави во парламентот. Нивните политички ривали од ДУИ велат дека не го забележуваат отсуството на Мендух Тачи и на неговите сопартијци. Сигурни се дека ДПА многу скоро ќе дојде во Собранието, но не веруваат дека тоа ќе биде пред изборот на новата влада. „Не очекувам да дојдат кога ќе ја избираме владата. Тие имаат многу гревови и затоа нема да ги критикуваат нашите кандидати“, вели Адеми.

За пратеникот од СДСМ Емилијан Станковиќ е нејасно дали Груевски и натаму ќе ги вика терористи новите коалициски партнери од ДУИ. „Падна во вода шестгодишното сатанизирање на сите политички чинители кои соработуваа со ДУИ, бидејќи ВМРО-ДПМНЕ ги нарекуваше терористи, освен ако премиерот и натаму не ги нарекува така министрите од ДУИ. Македонија залудно ги потроши изминатите две години оти ВМРО-ДПМНЕ можеше да направи коалиција со ДУИ уште во 2006 година“, вели Станковиќ.

Според пратеникот на Нова алтернатива Ѓорѓи Оровчанец, коалицијата ВМРО-ДПМНЕ и ДУИ е „врховистичко-терористичка“. „Едните велеа дека се терористи, другите дека се врховисти. И сега ќе имаме врховистичко-терористичка коалиција“, вели Оровчанец. За него е сосема јасно дека коалицијата ВМРО-ДПМНЕ и ДУИ е договорена уште пред распуштање на парламентот. „Зошто Груевски, кој имаше можност да формира влада без и еден коалиционен партнер, го испушти како 13-то прасе својот соработник Тачи, кој беше прогласен за војвода. Дали на следната седница на Централниот комитет ќе му ја одземат титулата“, се прашува Оровчанец.