Претседателот Иванов на азиска конференција

Истанбул - Претседателот Ѓорге Иванов, на покана од турскиот претседател Абдула Ѓул како почесен гостин од земјата-претседавач со Советот на Европа, присуствува на третата Конференција за интеракција и градење мерки на доверба во Азија (ЦИЦА), што се одржува во Истанбул.

На конференцијата, на која ќе присуствуваат шефови на држави и на влади на повеќе од 20 земји, меѓу кои претседателите на Иран - Махмуд Ахмадинеџад, на Авганистан - Хамид Карзаи и на Украина - Виктор Јануковиќ, како и на премиерите на Русија и на Кина, претседателот Иванов во обраќањето се очекува да го демонстрира својот генерален правец во македонската надворешна политика „отвореност кон сите“.

Македонскиот шеф на државата Иванов ќе оствари повеќе билатерални средби, меѓу кои со претседателите на Турција - Абдула Ѓул, на Казахстан -Нурсултан Назарбаев и на Азербејџан - Илхам Алиев. На средбите ќе бидат отворени повеќе политички теми, а ќе се дискутира и за можноста за енергетско поврзување и продлабочување на досега недоволно развиената економска соработка.

ЦИЦА е голем меѓународен безбедносен форум фокусиран исклучиво на зајакнувањето на соработката и промовирањето на мирот, безбедноста и стабилноста во Азија. Главна цел е да се создаде ефикасна и универзална безбедносна организација, слична по структура на ОБСЕ, чија дејност, главно, ќе биде насочена кон наоѓање издржливи решенија за глобалните предизвици и клучните закани по безбедноста на азискиот континент. (МИА)