Мислења

Ослободување во три слики

Гордан Горгиев

Oпозицијата мора да сфати дека огромното незадоволство на граѓаните мора да се канализира на креативен и позитивен начин

ОЧИ ШИРУМ ОТВОРЕНИ

Паралелата во насловот е зајмена од легендарниот југословенски филм „Окупација во 26 слики“ на Лордан Зафрановиќ. Несомнено е задоволството помешано со огорченост кај најголем дел од граѓаните на Република Македонија. Окупацијата во 100 чекори на ДПМНЕ ги доживува своите последни трепнувања. Но, не е време за еуфорија. Време е за самодоверба и време е за задавање на последните удари. Тој процес ќе го наречам работно „ослободување во три слики“.

Слика прва. Разнебитување и деконструкција на режимот на страв. Огромната енергија што експлодираше на протестот на опозицијата пред Владата на Република Македонија во многу нешта беше изненадувачки за сите „странични“ посматрачи. За нас во СДСМ не беше. Долги години тврдиме дека во Македонија владее еден режим на страв, кој ги затвора сите пори на слободно дишење и искажување слободен збор. Режимот имаше сериозна амбиција (и сериозни капацитети) да ја суспендира слободата во оваа држава. Исто така, долго време тврдиме дека ваквиот страв кај граѓаните во еден момент ќе попушти и ќе стане ужасен проблем за властодршците. Ете, се случи тоа. За изненадување на многумина и за огромно олеснување на сите граѓани што сакаат да живеат во нормална држава. Во оваа фаза веќе се' е полесно. Можноста за мобилизацијата на ресурсите на опозицијата (не само партиски ресурси, туку, пред се', граѓански) станува практично неограничена. Едноставно, сега секој потиштен, понижен, уплашен граѓанин знае дека има конкретна адреса каде да се обрати. И знае дека на таа адреса секогаш ќе му биде вратата отворена. И ќе биде заштитен. Храброста на луѓето што ни пријдоа и прифатија да учествуваат на протестниот митинг беше восхитувачка. Лиле од Куманово, Дуле од Могила, Ивица Хоризонт, Дејан Гацов, претставниците на невладиниот сектор и сите други познати и непознати јунаци што ни пријдоа се голем поттик, но и голема одговорност за сите нас. Тие упатуваат порака и до сите останати дека не е време за молчење. Ова невреме мора да се победи со гласен крик против малата група сурови властодршци на чело со Груевски.

Резултат од слика прва: Остварено!

Слика втора. Сеопшт опозициски фронт против остатоците од режимот и мобилизација на неопределените и разочараните гласачи. Премиерот во заминување, Груевски, мора да сфати дека е исправен пред една тешка дилема: дали и натаму ќе се обидува да ја дозакопува државата и нејзините граѓани по сите основи или ќе направи последни обиди да коригира некои од неговите носечки политики, особено во економијата и почитувањето на слободите и правата на граѓаните. Во првиот дел од дилемата треба да му е јасно дека жестоко ќе биде поразен на следните избори, но заедно со него ќе биде поразена и државата и ќе треба време да се санираат несогледливите штети од неговото владеење. Во вториот дел од дилемата големи се шансите повторно да ги изгуби следните избори, но достоинствено, со заминување во опозиција која би била сериозен, конструктивен и потребен коректор на идната власт. Како прв чекор, им предлагам да престанат секојдневно да се занимаваат со опозицијата и да се фатат со решавање на проблемите на граѓаните. Веќе цела година целокупната пропагандна црна машинерија на власта има една и единствена цел: да ја оцрнува опозицијата, да пушта платени политички програми против опозицијата, да го труе јавниот простор со ситни подметнувања и политички флоскули за еднократна употреба. Пријателски предлог до Мартинчо: престанете со црната пропаганда, тоа ќе ве дозакопа. Дојдовте до моментот (кој многу пати го предвидовме и ве предупредивме) кога вашиот ПР оди неколку чекори пред самата содржина на пораките. Еве дојдовте во ситуација деновиве да се борите против ветерници со лицитирање на бројките на присутни на протестот на СДСМ, да ширите лажни информации до вашето членство, да го истопорите премиерот јавно да се посрамоти со негово лично (ееј, премиер на држава) лицитирање со лажни бројки. Нас не не интересираат бројки. Ние не ги гледаме нашите поддржувачи како какви-такви бројки. Ние ги гледаме како свесни индивидуи, кои го подигнале својот глас против овој режим. Бројките и математиките ќе ви ги оставиме вам.

Од друга страна, сегашната опозицијата на чело со СДСМ мора да сфати дека огромното незадоволство на граѓаните од оваа власт мора да се канализира на еден креативен и позитивен начин. Кога велиме дека Ние сме за победничка Македонија, токму и го мислиме тоа. Дојде време кога граѓаните оправдано си го поставуваат прашањето: добро, сфативме дека ДПМНЕ ја води државата кон катастрофа, ај сега кажете ни вие зошто и како ќе бидете подобри од нив? Политичката понуда, потребата да се докажете пред гласачкото тело зошто и со што сме подобри од политичкиот противник е клучната политичка игра во наредниот период. СДСМ забревтано се подготвува за таквиот пристап.

Резултат во најава: Кредибилна и остварлива политичка понуда што ќе се спротивстави на сеењето магла и популизмот на сегашната власт во заминување.

Слика трета. Обнова. Признавам, ова е најтешкиот дел. Ова е и најголемата непознатост. ДПМНЕ успеа со една осмислена кампања и силна пропагандна машинерија да ги држи граѓаните во четиригодишен транс. Се разбира, празните ливади на Бунарџик 1, 2, 3 итн, колапсот во здравството, дишењето на жабри на речиси сите фирми во Македонија и многу други индикатори укажуваат дека на оваа голема шарена лага и се гледа крајот и дека граѓаните се освестуваат од трансот. Но, она што ќе остане по владеењето на ДПМНЕ е, сепак, непознато за сите нас. Периодот на обнова ќе значи комплетен скрининг на институциите на системот, осознавање на последиците од дпмнеовскиот пустош и силна волја и солидарност на сите слоеви од граѓанството да се стави државата во правилен колосек. Обновата, се разбира, е и најодговорниот дел од приказната. Таа треба да ги мобилизира граѓаните и да ги повика да размислуваат и за себе самите и за иднината на ова општество. Од индивидуалното кон колективното и назад. СДСМ е подготвен за таквите предизвици. Добро би било да се подготви и секој од вас. За татковината се работи.

Резултат во најава: Додека трае обновата, нема одмор.

П.С. Триумфалниот колапс на триумфалната порта и голем дел од расипничкиот проект „СК-2014“ го означувам како симболичен почеток на крајот на триумфализмот на овој ненароден режим.

(Авторот е потпретседател на СДСМ)