Американски сенатори бараат поддршка од Обама за Македонија

Вашингтон - Четворица американски сенатори испратија писмо до претседателот Барак Обама во кое бараат конкретно да се ангажира кај НАТО-сојузниците Македонија да добие формална покана за членство во Алијансата на претстојниот самит во Лисабон.

Сенаторите Марк Бегич, Ричард Лугар, Џејмс Риш и Џорџ Воинович во писмото до Обама наведуваат „САД треба да стават јасно до знаење дека прашањето за името не треба да се поврзува со проширувањето на НАТО. Јасната покана до Македонија да и' се приклучи на Алијансата на лисабонскиот самит ќе биде од корист за американската национална безбедност и за глобалната мисија на НАТО“.

Сенаторите Лугар и Риш се членови на Комитетот за надворешни работи, а Бегич на Комитетот за армиските служби на Сенатот. Заедно со сенаторот Воинович досега поднеле повеќе иницијативи во Сенатот за поддршка на Македонија, а особено за нејзин прием во НАТО.

Администрацијата на Барак Обама треба да се заложи за итен прием на Македонија во северноатлантската Алијанса на самитот во Лисабон и да бидат предводник во поддршката на проширувањето на НАТО, сугерира аналитичарот на американската фондација „Херитиџ“, Сели Мекнамара, во анализата „Стратегискиот концепт на НАТО 2010: Пет индикатори за успех“.

„Македонија ги исполни сите услови за членство во Алијансата и уште во 2008 година ги комплетира сите барања од Акцискиот план за членство. Земјата е и меѓу најголемите контрибутори според бројот на жители во мисијата на НАТО во Авганистан“, наведува Мекнамара. (МИА)