Поглед

Страст за реклами

Мирче Јовановски

Нашиот народ, бездруго, е многу неук и неедуциран, барем во очите на власта, која малку-малку, па ќе посегне по некоја кампања за негово воздигнување.

Еднаш тоа се кампањи за поволностите што ги носи со себе образованието, другпат дека треба да ги регистрираме куќните совети, трет пат дека многудетството е благосостојба за нацијата, дека е добро да се користи безготовинското плаќање...

И покрај многуте реакции дека ваквиот начин на комуницирање со населението не е сосема оправдано, барем не од аспект на трошење на народните пари (и тоа најчесто по селективна основа и кај строго определени медиуми), Владата, односно Министерството за финансии остана доследно на своите определби. Сега преку кампања граѓаните ќе се потсетуваат дека истекува рокот во кој можат да ги откупат дворовите, и тоа за едно евро квадратен метар. За таквата едукација ќе бидат потрошени ни помалку ни повеќе туку 307 илјади евра.

Во време кога во буџетот се слеваа пари на големо, ваквата кампања можеби и ќе поминеше без поголема гласност. Но, кога кризата ги коси домашните фирми, што најдобро се гледа по нивните финансиски резултати, и кога граѓаните секој ден се соочуваат со нови цени на основните прехранбени производи и се прашуваат како ќе го врзат крајот на месецот, за вакви кампањи, едноставно, не треба да има место.

Многу попродуктивно би било Владата и министерствата да ги впрегнат силите и да ја оспособат администрацијата да биде поефикасна и да биде вистински сервис на граѓаните отколку непродуктивно да се трошат буџетските пари. Во тој случај, сосема доволни би биле неколку јавни настапи на надлежните по медиумите (кои се бесплатни), па кампањата да има поголем ефект отколку скапите и бесцелни реклами.