Како се носеше буџетот во Кавадарци
Јасминка Ѓорѓиева-Тодорова, Служба за комуникација со јавноста
Кабинетот на градоначалникот на Општина Кавадарци, Панчо Минов, заради реално информирање ја дава следната информација во врска со поднесување на буџетот за 2008 година. Советот на Општина Кавадарци одржа седница на 31.3.2008 година на која заеднички договорен предмет на дневен ред помеѓу предлагачот - градоначалникот и претседателот на Советот беа одлуките за извршување на буџетот со намена за капитални инвестиции и буџетот на Општина Кавадарци за 2008 година. На седницата Советот одлучи спротивно од договореното прво да се донесе предлог-буџетот, а потоа сите други одлуки за извршување на буџетот. Поради неспроведување на договореното за одржување на расправата, градоначалникот како законски овластен предлагач го повлече буџетот и сите точки од дневниот ред поради несигурност дали ќе се донесат одлуките за извршување на буџетот.
На повторна координација со претседателот на Советот се договори да се вратат точките од усвоениот дневен ред од Советот, но буџетот да се усвои со заклучок по донесување на одлуките за извршување на буџетот. На расправата по предлог- буџетот, група советници на самата седница, без претходно информирање на предлагачот, предложи 54 амандмани на предлог-буџетот, што всушност значи паралелен буџет, во кој амандманите, ги намалуваат и ограничуваат законските права на плати, придонеси и надоместоци на градоначалникот и вработените во општинската администрација, а своите права на надоместоци, спротивно на законскиот лимит на надоместок, ги зголемуваат, потоа не предвидуваат средства за нови вработувања, кои се законска обврска со влезот во втора фаза од децентрализацијата; ги намалуваат и средствата што ќе се добијат од Владата кои беа реална основа за финансирање на објекти во основното и во средното образование, како спротивно на законот ја намалуваат и воопшто не ја предвидуваат позицијата за учество на локалната самоуправа во формирањето на центар за рамномерен регионален развој, што е законска обврска.
Горенаведената бројка на поднесени амандмани и нивната содржина фактички ��начи паралелно предлагање буџетот од страна на советниците, иако градоначалникот е единствен законски предлагач и извршител на буџетот. Не прифаќајќи ги предложените амандмани од советниците, градоначалникот го повлече предлог-буџетот на Општина Кавадарци за 2008 и одлуките за извршување на буџетот поради неможност да преземе одговорност како законски извршител на буџетот каков што предлагаат советниците.
Поради недонесување на буџетот предложен од градоначалникот до 31 март, градоначалникот го извести Министерството за локална самоуправа за исполнување на условот за распуштање на Советот, согласно со член 75 став 1 точка 4 од Законот за локална самоуправа. |
