Претходен број

Владата не гледа криминал во „Сведмилк“

Газдата на „Сведмилк“, Моша Баум, на информативен разговор во МВР

Александрија Стевковска

Владата се' уште не гледа криминал во „Сведмилк“. Вчера премиерот Никола Груевски најави дека доколку се открие криминал во работењето на млекарницата, некој ќе излезе и ќе го каже тоа. Тоа би значело дека досега не е откриено ништо незаконско во работењето на фабриката и дека ништо не се прави за да се преиспита тоа, иако повеќе од пет месеци се упатува на голем криминал во „Сведмилк“. Имено, и фармерите и останатите доверители на млекарницата со месеци наназад посочуваат дека фирмата до банкрот ја донесе старото раководство на фабриката, кое успеа на инвестиција тешка 15 милиони евра да и' набилда долг од околу 40 милиони евра, се дави во криминал, но очигледно тоа не е доволен стимул за Владата да испрати свои луѓе за да го проверат тоа.

Инаку, судот се' уште не донел одлука дали „Сведмилк“ ќе оди во стечај, иако според Законот за стечај, судот во рок од 8 дена треба да донесе решение дали се исполнети условите за почнување стечајна постапка или не. Според наши извори, стечајот на „Сведмилк“ е неизвесен, бидејќи барањето на подносителот на тоа барање, Горан Митров, не е сосема чисто. Имено, според некои сознанија, сметките за долгот на Митров содржеле неточни суми на исплата и исплати повисоки од сумата што требало да му биде исплатена. Токму поради тоа новиот менаџмент на млекарницата не верува дека таа ќе оди во стечај.

„Доколку ’Сведмилк‘ отиде во стечај, ќе изгубат сите, и фармерите и раководството, и сите останати должници“, велат од млекарницата.

Во очекување на исходот од судската одлука за иднината на фабриката, новото раководство исплаќа дел од долговите, но не го прави тоа според некој ред, туку произволно. Така, според податоците од листите на исплата, може да се види дека тука покрај за фармерите, на кои им е исплатен околу половина милион евра, останатата половина е исплатена за струја, адвокатски услуги, услуги од службите за обезбедување, нафта, плати за вработените. Парите се делумно префрлани од сметката на „Феникс енерџи“, а делумно од сметката на оранжеријата која оваа компанија ја поседува во земјава. Парите се префрлени со потпишување цесиски договори. Најголем дел од фармерите кои се исплатени се од пелагонискиот крај, додека скопските немаат земено ниту денар.

Поминува вториот месец откако „Сведмилк“ е преземена од израелско-американскиот фонд, а се' уште не успеа, иако вети, да им ги исплати 4 милиони евра што им ги должи на фармерите за предаденото млеко за цели осум месеци. По многуте лажни ветувања, фармерите полека ја губат и последната надеж дека ќе ги добијат парите.

Затечени од поднесеното барање за стечај за „Сведмилк“ од струмичкиот земјоделско-сточарски комбинат, некои од фармерите решија и тие да се приклучат кон барањето за стечај, сметајќи дека со тоа би добиле дел од парите од стечајната маса. Фармерите се' уште не можат да си објаснат како оваа млекарница успеа да пропадне за нецела година и се прашуваат каде беа Владата и сите институции, кои не се заинтересираа да проверат каков криминал се случувал во „Сведмилк“.

Газдата на „Сведмилк“ на информативен разговор во МВР

Сопственикот на „Сведмилк“, Моша Баум, бил повикан на информативен разговор во полицијата. Оваа вест вчера ни ја потврдија од канцеларијата на Баум. Во МВР ниту ја потврдуваат ниту ја демантираат ваквата информација.

„Кога ќе има и доколку има кривична пријава против него, веднаш ќе ги известиме медиумите“, ни изјави Иво Котевски, заменик-министер за односи со јавноста при МВР.

Од канцеларијата на Баум ни потврдија дека тој бил повикан на информативен разговор во МВР поради пријава на Земјоделско-сточарскиот комбинат од Струмица. (Г.А.)