Претходен број

Државните врати отворени за 30.000 партиски кадри

Опозицијата се сомнева дека се прави законска рамка за целосно партизирање на јавната администрација

Опозицијата вчера обвини дека се прави законска рамка за удомување на 30.000 партиски кадри на владејачката ВМРО-ДПМНЕ во јавната администрација. Вакви намери опозиционерите препознаа во измените на Законот за државни службеници, чие прво читање вчера едногласно помина во парламентот.

Социјалдемократите го критикуваа законското решение со кое „министерот за правда, Михајло Маневски, ќе им овозможи експресно напредување во кариерата на партиските војници на ВМРО-ДПМНЕ“, но, гласаа за потребата од донесување.

Признанието на разрешениот министер за финансии, Трајко Славески, дека овој ресор една година е без државен секретар, поради тоа што „со премиерот не успеале да најдат заедничко решение“, за поранешниот премиер, пратеникот од СДСМ, Владо Бучковски е само уште еден доказ за намерите за целосна партизација на администрацијата. Во прилог на ваквото тврдење, а и како своевиден куриозитет, тој го посочи и минатонеделното „појаснување“ од Владата дека државниот секретар во Секторот за евроинтеграции, Перо Димшоски, бил вработен со договор на дело!

„Треба реално да ја погледнеме бројката на партиските војници кои се дел од администрацијата, а немаат статус на државни службеници. Се сомневаме дека нивната броја во државната администрација е 10.000, а во јавната администрација вкупно 30.000“, рече Бучковски. За него се неприфатливи и условите за напредување во службата. „Нема држава во Европа каде што за пет години се доаѓа до највисокото скалило во службата. Затоа и ни се случува Собранието да избира приправници за министри“, заклучи Бучковски.

Неговата партиска колешка Славица Грковска-Лошкова го праша министерот за правда, Маневски, „ зошто се плаши од ЕУ и зошто пред законот нема европско знаменце, па да оди во забрзана процедура“. Таа го потсети Маневски дека уште во март сме добиле препорака од Брисел, колку што е можно побрзо да направиме поефикасна јавна администрација. Притоа, додаде дека наместо професионална, ќе има партиска администрација за членовите и симпатизерите на ВМРО-ДПМНЕ.

Пратеничката Весна Бендевска од СДСМ е убедена дека со споменатите законски корекции, државни секретари ќе можат да бидат и луѓе кои немаат ниту еден ден статус државен службеник. Бидејќи, единствен услов за тоа е тие да биле на раководна функција во јавна администрација.

Според пратеникот Васко Шутаров од ВМРО-ДПМНЕ, опоз��цијата манипулира со бројките, па затоа ја повика обвинувањата да ги поткрепи со докази. „Доколку опозицијата сакаше да ја деполитизира администарцијата, немаше да стави висок партиски функционер на чело на Агенцијата за државни службеници, како поранешниот министер за локална самоуправа, Александар Гештаковски. Тоа беше врвен чин на политизација на Агенцијата на државни службеници“, изјави тој. Шутаров негираше дека целта на овие законски измени е да се смени Гештаковски.

Нагласувајќи дека овие се 17 измени на Законот за државни службеници тој констатира дека „јавната администрација е се' уште во тесни чевли и оди со ситни чекори напред“. Како што рече тој, „никој не тврди дека администрацијата е целосно деполитизирана, но ова е чекор за нејзина деполитизација“.