Насловна

И уште нешто...

ИПАРД-денови

Од денес до 26 август ќе се одржат ИПАРД-информативни денови за запознавање на земјоделците и компаниите со можностите за користење на средства од ИПА-компонентата за рурален развој, од Програмата за 2007-2013 година. Информативната кампања ја организираат телото за управување со ИПАРД при Министерството за земјоделство, во соработка со Агенцијата за финансиска поддршка во земјоделството.



ЕУ-критериуми

Македонија во 2009 година ги исполни политичките критериуми за членство во ЕУ и доби препорака од ЕК за почеток на преговорите, која беше повторена и во 2010 г., но спорот за името не дозволи да ги започнеме преговорите за членство, иако ги исполнивме сите услови за тоа.

Ова го истакна вицепремиерот Васко Наумовски во отчетот по повод завршувањето на својот мандат.



Здравство

Од 2008 г. досега е вложено многу во модернизација на здравството, но најважно од се' е вратениот оптимизам кај пациентите во здравствениот систем, кој по 20 години запоставеност нуди поквалитетна дијагностика и третман. Ова го истакна министерот за здравство во заминување, Бујар Османи, на прес-конференцијата за позначајните проекти што ги спровел за време на тригодишниот мандат.



Разделба

Министерот за надворешни работи, Антонио Милошоски, во Клубот на пратеници организираше проштален прием за дипломатскиот кор во земјата. Како што соопшти МНР, на приемот присуствуваа и голем број гости што во изминатиот период соработувале со министерот Милошоски, кој си заминува од функцијата шеф на дипломатијата.



Испраќање

Премиерот Никола Груевски во Виена присуствуваше на погребот на австрискиот надвојвода Ото фон Хабсбург, кој почина на 4 јули на 98 години во својот дом во Баварија.

На комеморацијата присуствуваат многу видни државници и политичари од повеќе земји, како и претставници на кралски семејства од Европа.