Претходен број

Канал 5 прибежиште за новинарите од А1

Во изминативе пет години дури 12 новинари преминаа од едната во другата телевизија

Светлана Унковска

Големиот трансфер на дури шестмина новинари од А1 и А2, кои од денеска веќе и официјално преминаа во Канал 5 телевизија, во јавноста предизвика низа шпекулации. Заменикот-уредник на А2 и водител на емисијата „Код“ Снежана Лупевска, заедно со новинарите Елизабета Галевска, Маја Јовановска, Миомир Серафиновиќ, Емилија Јовановска и Мирјана Мирчевска решија да го напуштат медиумот, во кој некои од нив почнаа да работат уште од самиот почеток на А1 телевизија.

Дали единствената причина за големата преселба на новинарите е поради, како што и самите изјавуваат, подобри услови, или, пак, во прашање се некакви поинакви мотиви и сценарија со кои и порано се соочувала оваа телевизија, но сега со друг актер. Она што меѓу новинарите се говори е дека како една од главните причини за заминувањето на новинарскиот тим е оти тие биле незадоволни затоа што веќе подолг период морале да ги исполнат поставените норми од минимум 20 до 25 прилози месечно, но како последен отворен притисок за нивно заминување било и намалувањето на платите. И доколку сето ова беше единствената причина се' ќе беше во рамките на сопствените одлуките на новинарите, но, сепак, поинтересниот дел од целата приказна е дека трансферот на овие шест новинари има и поинаква позадина.

Сопственикот на А1, Велија Рамковски, потврдува дека нивното заминување ќе биде голем удар за телевизијата затоа што си заминуваат новинари кои со години работеа таму. Тој додава и дека вакви потреси неговиот медиум доживувал и пред пет години кога поради слични политички сценарија се случи првиот голем трансфер на новинари.

Во 2004 година од А1 телевизија заминаа главниот уредник Ацо Кабранов, Васко Попетрески, Лидија Јанчовска и Соња Петрушевска. И она што е особено интересно во овие новинарски преселби е тоа што тука постои една единствена рута - од А1 во Канал 5. Пред да го најават своето заминување шестемина новинари, од телевизијата на Рамковски си заминаа уште двајца новинари, Горан Момировски и Весна Велкова, и повторно Канал 5 беше телевизијата каде што преминаа.

„Една група на чело со Снежана Лупевска си оди и, колку што можев да сфатам, тоа е поради поголеми плати. Во секој случај тоа се добри новинари, но А1 има доволно кадар и големи капацитети да го надмине и тоа. Можеби потежок удар беше трансферот на новинари што се случи во 2004 година кога на власт беше Црвенковски и тогаш групата на чело со Кабранов замина во Канал 5. Тогаш Стојменов беше во коалиција со СДСМ, но сега кога Груевски е на власт, тој повторно се врати со ВМРО-ДПМНЕ и сега ниеден новинар кој премина во тоа време не остана“, изјави Рамковски за „Утрински весник“.

Тој не сакаше отворено да зборува дали и во овој трансфер на новинари има некакви политички мотиви за медиумско ослабување на неговата телевизија, само додава дека и овој пат се повторува истото сценарио. Рамковски негира дека ова би можело да го загрози опстанокот на А2 и тврди дека не се точни информациите кои се пуштаат во јавноста дека има намера да ја згасне оваа телевизија и затоа вршел притисок врз некои новинари да си заминат.

Ова го потврдува и главниот уредник на А1, Младен Чадиковски, кој овие случувања во телевизијата го затекнаа додека е на годишен одмор.

„Мене навистина ми е жал што многу вредни репортери и новинари си заминуваат, но тоа, сепак, е нивна одлука. Нивното заминување нема да влијае на опстанокот на А2, таа и натаму ќе функционира, ќе има емисии, дебати и ние брзо ќе ги санираме овие состојби“, изјави Чадиковски.

Неофицијално се вели дека по одлуката на Рамковски да ја смени политиката на медиумска поддршка во однос на решавањето на спорот со името и антиквизацијата, кое се случи пред изборите, настана еден вид „студена војна“ меѓу него и премиерот Никола Груевски. Факт е дека оттогаш наваму во ниту еден момент не се случи директен фронт меѓу нив двајцата, но, сепак, Рамковски остана маркиран од страна на власта како еден од оние кои не им е благонаклонет и ги критикува. Така и овој групен трансфер се толкува како еден од обидите на власта да му зададе медиумски удар.

Дополнително се тврди дека покрај новинарските трансфери на А1 и се задаваат удари со тоа што ги губи правата за емитување на најзначајни и најгледаните емисии, шоуа и спортски натпревари, кои се откупуваат од Сител и од Канал 5 по два пати или три пати повисоки суми. Така А1 ги изгуби преносите од англиската Премиер лига и други емисии, што и покрај високите суми што треба да се платат за правата за емитување, кои не се покриваат со рекламите, односно носат загуби, сепак, тие се откупуваа затоа што и' носеа голема гледаност. За натпреварите на Премиер лигата, која пет години ја пренесуваше А1, за 400.000 евра годишно сега правата ги откупи „Сител“ за сума од над 600.000 евра.

Серијата „Опстанок“ за која А1 плаќаше по 30.000 евра за тримесечен период, ги откупува повторно „Сител“ по неверојатна сума од 350.000 евра. Во секој случај, ова се подразбира како еден од посериозните удари врз А1 телевизија, кој практично се сведе на пренесување на домашен фудбал. Ваквите притисоци се само дел од приказната дека Рамковски треба да се „фрли на колена“, но според познавачите на состојбите, тој е научен да опстојува со притисоци од власта и за да се совлада, сепак, ќе биде потребно многу време.