Затворите ќе добијат нов лик

 Целосно менување на ликот на македонските затвори со нивна комплетна реконструкција, најави вчера министерот за правда, Михајло Маневски, зборувајќи за Проектот за реконструкција на казнено-поправните установи. Тој додаде дека со него ќе се надмине лошата слика за казнените домови.

Вкупниот износ на проектот изнесува 52.000.000 евра, од нив 46 милиони се заем од банката за развој при Советот на Европа, Македонија ќе учествува со 2.500.000 евра, а останатите се од ИПА 2009 и ИПА 2010, како и од Фондот за инфраструктурни проекти и од владата на Норвешка.

„Со реализација на овие средства и изградбата на новите капацитети целосно ќе се промени ликот на затворите во Македонија, односно ќе се обезбедат услови за функционирање на затворите според европските стандарди“, изјави министерот Маневски.

Тој информираше дека ќе се реновираат и ќе се изградат нови објекти во казнено-поправниот дом „Идризово“, воспитно-поправниот дом Тетово, затворот „Скопје“ и кумановскиот затвор.

Во „Идризово“ со изградбата на нови објекти ќе се зголеми сегашниот капацитет од 900 на 1.510 лица. Ќе се гради ново приемно одделение, затворено, полуотворено, нови одделенија во Женскиот затвор, здравствено одделение.

Градежните работи во четирите установи ќе стартуваат во 2011 година. (П.Р.)