САД нема да ја менуваат политиката спрема Македонија
Вашингтон - Продолжувањето на македонско-грчките разговори за изнаоѓање прифатливо решение за името, интегрирањето на Република Македонија во НАТО и состојбата на Балканот, беа темите за кои прексиноќа во Стејт департментот разговараа министерот за одбрана, Зоран Коњановски, и Даниел Фрид, помошник-државен секретар за европски и евроазиски прашања.
Фрид изразил жалење затоа што администрацијата на претседателот Џорџ Буш не успеала да и' помогне на Република Македонија да стане полноправна членка на Алијансата. Според него, администрацијата на новоизбраниот претседател Барак Обама нема да ја промени политиката на САД спрема Република Македонија. Во таа насока тој е убеден дека за многу брзо време ќе се изнајде решение за Република Македонија да стане членка на НАТО.
Министерот Коњановски го посети и Националниот универзитет за одбрана, каде што секоја година 54 земји испраќаат свои кандидати на дошколување. Моментно магистерски студии посетуваат двајца македонски офицери. Претседателот на Универзитетот, Франсис Вилсон, ги нагласи посветеноста и подготвеноста на македонските офицери, изразувајќи подготвеност да се продолжи соработката со Министерството за одбрана и со Генералштабот на АРМ. Досега петмина македонски офицери се стекнале со магистерски дипломи од Националниот универзитет за одбрана во Вашингтон. (МИА) |
