Претходен број

Анкети многу, кандидати нема

Според анкетата на „Форум“, Керим и Бошкоски имаат најголеми шанси на претседателските избори

Оливера Војновска

Независно од тоа што во главните партии на политичката сцена има целосен молк, ги кријат или, пак, се' уште ги немаат адутите со кои ќе истрчаат на претседателските избори, пробните балони веќе почнаа да се пуштаат од разни политички центри, агенции, медиуми. Кандидатите ги нема никаде, но фрчат анкетите - теренски и телефонски. Во ваквите сондажи се извртеа имињата на неколкумина можни кандидати блиски до власта или до опозицијата, но двете партии не ги откриваат картите.

Вчера неделникот „Форум“ ја објави анкетата според која Срѓан Керим и Љубе Бошкоски имаат најголеми шанси за победа на пролетните претседателски избори. Во анкетата која за потребите на „Форум“, ја изработила агенцијата „Рејтинг“ во почетокот на овој месец, а биле вклучени 1.080 испитаници, се споменуваат шефот на државата Бранко Црвенковски, Имер Селмани, Зоран Ставрески, Благоја Ханџиски, Гзим Острени и Илинка Митрева.

Резултатите од испитувањето покажуваат дека за Керим би гласале 35 отсто, за Бошкоски - 31, за Црвенковски - 25 , за Зоран Ставрески - 24, за Благој Ханџиски - 18, за Гзим Острени - 17, за Илинка Митрева - 13 и за Имер Селмани - 10 отсто од анкетираните.

Главниот и одговорен уредник на „Форум“, Слободан Чашуле, на вчерашната прес-конференција, соопштувајќи ги резултатите од анкетата, констатира дека македонската јавност зрее. Во прилог на ваквата констатација, тој го изнесе податокот дека за Селмани се определиле 10 проценти од испитаниците-Македонци. „Ако понудата од, условно кажано, македонскиот дел е слаба, може македонското гласачко тело да ја побара алтернативата во претставник на етничките заедници, но поради неговата личност, а не поради партиската припадност“, смета Чашуле.

„Излегува дека Срѓан Керим и Љубе Бошкоски практично се изедначени. Ако влезат Бошкоски и Керим во вториот круг, Керим би победил зашто би ги освоил гласовите на етничките заедници, пред се' албанската и турската“, прогнозира Чашуле.

В.д. лидерот на СДСМ Зоран Заев вчера ја коментираше анкетата на „Форум“ изненаден поради тоа што Црвенковски е претставен како кандидат за следните избори иако јавно потврдил дека нема да се кандидира. Заев рече дека во партијата се' уште разгледуваат кој би можел да биде кандидат и оти предвид имаат партиски членови, но и експерти и дипломати.

Главниот уредник на „Форум“ не е докрај убеден дека Црвенковски нема да влегува во изборната трка. И доколку се случи „поради високи државни цели Црвенковски да се кандидира“, Чашуле смета дека на неговите 25 отсто поддршка би требало да се додаде и дел од поддршката што ја добиле Ханџиски и Митрева. Процентите, се разбира, не може пластично да се соберат.

На последната анкета на ИРИ, на која беше мерена поддршката на неколкумина можни претседателски кандидати, 44 отсто доби Бошкоски, 43 отсто - Керим, 34 отсто - Ставрески, 25 - Пенов и 29 проценти доби Ханџиски.