И новата грејна сезона ќе биде без калориметри

Три години кај фирмите-снабдувачи со парно не се јавил ниеден заинтересиран куќен совет

Снежана Калабакова


И оваа грејна сезона скопјани ќе останат без калориметри. Со топлината на радијаторите и натаму ќе управува „Топлификација“, а не тие самите. Три години откако тр��те фирми-снабдувачи на АД „Топлификација“ ја најавија можноста за воведување на таканаречените топлински распределители, ниту еден куќен совет не е заинтересиран за нивно поставување. Никој не се јавил дури и да ја искористи можноста за плаќање на осумнаесет месечни рати. Цената на калориметрите е главната причина за незаинтересираноста на граѓаните, бидејќи секое домаќинство ќе мора да инвестира 200 евра за овие уреди.

Од друга страна, пак, корисниците се неинформирани каде и од кого треба да ги купат уредите. Не знаат и нема кој да ги упати чии калориметри да земат, а мораат да изберат меѓу трите фирми со кои „Топлификација“ соработува германската „Техем“, данската „Буцнати“, англиската „Хаемр“. Фирмите немаат седиште во Скопје, па евентуално заинтересираните за да купат вакви уреди можат да се информираат само на Интернет. Втората опција им е да се обратат во фирмата што ги снабдува со топлинска енергија „Снабдување Исток“, „Снабдување Запад“ или „Снабдување Центар“. А, кај нив, досега нема заинтересирани корисници. Во правец на популаризација на калориметрите не прават речиси ништо и снабдувачите со топлинска енергија, иако нивното поставување беше услов да добијат лиценца за работа. Но, во случајов Регулаторната комисија нема да им ја одземе лиценцата, иако трите снабдувачи направија чекор со кој повторно ги ставија граѓаните во ќор-сокак.

Снабдувачите велат дека тие не можат ништо ако граѓаните се незаинтересирани. Топлификација со законска поткрепа од регулаторот се оправда дека не може да инвестира во калориметри, но и јавно призна дека за неа тоа е голема инвестиција. Од друга страна, пак, ако и инвестира, трошокот, секако, ќе го вкалкулира во цената на парното, па така ќе мора да плаќаат и оние граѓани што ќе чекаат калориметрите да им бидат монтирани. Славко Бундалевски, раководител на секторот на природен гас и топлинска енергија во Регулаторната ��омисија, вели дека регулаторот и натаму ќе притиска да се реализира поставувањето на топлинските распределители, бидејќи тие на граѓаните ќе им овозможат штедење енергија.

„Неофицијално имаме разговарано со неколку куќни совети, кои подетално ги информиравме за поставувањето на калориметрите. Цената, грубо кажано, е 50 евра од радијатор со комплет распределител и термостатски вентил, со можност за плаќање на 18 рати. Фирмата од каде ќе се набавува опремата ја бираат самите станари“, велат од „Снабдување Исток“.

Оттаму додаваат дека засега имаат само еден пилот-проект за поставување топлински распределители на две станбени згради, една во Автокоманда и една во Аеродром, но не знаат и тој како ќе заврши.

Доколку имаше заинтересирани за калориметрите, „Топлификација“ досега требаше да инвестира во мобилните читачи и во софтверот за исчитување на податоците од уредите. Целокупниот процес на инсталирањето на софистицираната опрема, односно на базните станици во станбените згради до кои ќе доаѓа радиосигналот со податоците од распределителите, според најавата на трите снабдувања требаше да заврши до 10 октомври минатата година. Снабдувачите најавија дека веднаш потоа куќните совети ќе добијат понуди за вградување на уредите, кои поради спецификата на системот ќе се монтираат по принципот или сите станари во еден објект или никој. Поточно, услов е најмалку 80 отсто од потрошувачите во една зграда да имаат инсталирано распределувач и за тоа да постои техничка можност.