„Семејни стебла“ за Денот на музеите

На изложба во Музеј на Македонија ќе бидат презентирани 30 семејни стебла

Меѓународниот ден на музеите 18 мај, вечерва во Музејот на Македонија во 20 часот ќе биде одбележан со отворање на изложбата „Семејни стебла“, а во постојаната поставка на Етнолошкиот музеј ќе биде отворен и нов амбиент на стопански двор - гумно.

Изложбата „Семејни стебла“ ги бележи семејните хронологии во изминативе три века и е најавена како сведоштво на длабоко вкоренетите семејни темели и вредности, на општествениот, економскиот и културниот живот во Македонија.

Преку фотографии ќе бидат прикажани 39 семејни стебла на семејствата: Аџиевци, Аницин, Тошеви-Кареви, Дртковски, Коку, Капмаре, Прокопиеви, Балабјан, Чепрганови, Димковци, Филиповци, Гечеви, Хаџи Лега, Букле, Бомбол, Бунтески, Дика, Сима, Фрчковски, Груеви, Кокалевци-Ѓурчинови, Крлиу, Личоски, Рубен, Османли, Топуковски, Зографски, Бајрам, Тавитјан, Влашки, Настеви, Миќуновиќ, Милачиќ, Новичиќ, Ераковиќ, Мирчевци, Топузи-Матковски, Жунгуловци и Поп-Антовски. Истоимениот проект е работен по идеја на директорката на Музејот, Мери Аницин Пејоска, под раководство на вишиот кустос Виолета Ѓорѓеска. Во реализацијата како дел од музејскиот тим, се вклучени и кустосот Боро Бунтески и дизајнерот Гордана Георгиевска. Изложбата е и најава за понатамошни истражувања во соработка со заинтересираните семејства за збогатување на збирката „Семејни стебла“.

Вечерва ќе биде презентиран и проектот „Ранохристијанска уметност на територијата на Македонија”, сочинет од дела на учениците на Интернационалното средно училиште, работени под раководство на проф. Теон Џинго, во соработка со музејскиот едукатор Лена Анѓелковска.

Во рамките на одбележувањето на Денот на музеите, на 19 мај во 12 часот, во киносалата на Музејот на Македонија ќе биде промовирано и најновото издание на зборникот „Историја бр. 3“. (К.Б.)