Интервју

Добивав закани, но не верував дека ќе се остварат

Фијат Цаноски, сопственик на „Фине“

Сопственикот на фирмата „Фине“ и инвеститор на комплексот „Космос“, Фијат Цаноски, смета дека суштината на проблемот не се неплатените рати за комуналии, туку решението за уривање

Љубиша Станковиќ

Разговорот со сопственикот на станбено-деловнио�� комплекс „Космос“ и пратеник во Собранието од редовите на ПЕИ, Фијат Цановски, го водевме во момент кога фирмата задолжена за уривање на објектот го сечеше и петтиот потпорен столб.

Господине Цаноски, веќе пет дена се урива Вашиот станбено-деловен комплекс „Космос“, а сега се бара активирање на хипотека.

Активирање на хипотеката се' уште нема. Јас тврдам дека само две рати не и' се платени на Општина Гази Баба и затоа нема потреба градоначалникот да лаже. Комуналиите не се предмет и не се многу битни. Предмет треба да биде постапката - зошто се руши објектот. Но, тие немаат што друго да кажат и затоа целата постапка ја водат незаконски.

Ќе успеете ли да го решите проблемот со извршување, односно наплатата од 11 милиони евра?

Судот нека постапува како што треба. Ако мислат така, тогаш добро. Мене не ми се проблем тие две рати да ги платам, а ако дојде до комплетно извршување, нема да дозволам да се продава имотот.

Кој од заложениот имот е цел на пленидба?

Мислам дека се локации. Градежни локации во Скопје и една во Струга, но не и куќата, како што тврдат некои медиуми.

Изјавивте дека „ќе Ве сечат по изборите“. Кој Ви се закани?

Не можам да говорам за имиња. Заканите постоеја, но мислев дека нема да се остварат.

Споменувате некакви државни советници и инвеститори. Ќе посочите ли некои конкретни личности?
Не, не можам да кажам.

Дали е точно дека сте и' дале пари на Општина Гази Баба уште пред да почнете со градбата и со плаќање на комуналии?

Јас ги покажав и повторно ќе ги дадам на увид тие уплати, иако градоначалникот сега тврди нешто сосема друго. Еве од договорот, од 25 октомври 2010 година, во него се потврдува дека сме дале пари, а дозвола за градба добивме дури на 24 декември истата година. Со плаќање на комуналиите, според договорот, требаше да започнеме од јануари годинава. Во октомври градоначалникот ми побара 10 милиони денари и тие пари му беа дадени. Но, овде не говориме за плаќање на комуналии. Тие, повторувам, не се предмет на расправа. Целокупната јавност треба да ја интересира: дали решението за уривање е законско.

Дали јас ќе останам без некој имот и тоа не е некој особен проблем. Проблем на целокупниот македонски народ треба да му биде: дали во оваа држава ќе се почитуваат законите? Дали се водат законски постапки? И дали е законско решението за уривање на „Космос“? Приватна работа е дали ќе ми биде одземен нешто од имотот или не.

На прес-конференција јавно ги повикавте странските инвеститори да не вложуваат во Македонија. Дали го направивте ова само поради она што Вам Ви се случува или поради правната несигурност што владее во државава?

Гледајќи дека се постапува незаконски кон мене, како човек кој се' што заработил во странство го инвестирал овде во Македонија, се поставува прашањето како ќе помине еден странски инвеститор. Јас постојано повторувам дека политиката не треба да се меша во економијата, во бизнисот. Овде, за жал, гледам дека тоа се работи. Еве, доколку инспекторката и Општината направиле пропуст, зошто тогаш Владата, со своите надлежни служби, не им изврши ним контрола во работењето? И сега има време да го направат тоа. Нека ги прегледаат законите, нека се направи повторно мерење, а јас на увид ќе им доставам ново, стручно мислење од Архитектонскиот факултет. Во него се објаснува како треба да се мерат котите. Инспекторката мерела со метар и така констатирала дека котата е надмината за 1,43 метри.

Токму поради ова постои закон, кој што е пишуван од експерти. Тие кажуваат како се мери висината на приземје. Во нашиот случај се работи за повисоко приземје, а не за тоа дали објектот е повисок од пропишаното. Конечно тој треба да се гради уште 40 метри во височина. Тоа е она што треба да се каже. Тука се гледа дека инспекторката постапила нерегуларно.

И луѓето од Општината треба тоа да го проверат она што ние цело време им го кажуваме. Ако немаат таков стручњак ќе им го дадеме мислењето во кое точно е наведено дека „доколку регулационата линија не се совпаѓа со градежната линија, како што е тоа во предметниот случај, односно кога има пад, (тука се тие 1,43 метри), височината на нулта-плочата се определува во однос на котата на заштитниот тротоар на градбата, од страна на пристапната улица“. Сето ова стои и во членот 47 од законот.

Како ги коментирате оркестрираниот настап и на Градот Скопје и на Државниот градежен инспекторат?

Се' е тоа поврзано. Комплетно е поврзано. Мене ми е с��мо жал што жалбите што ги поднесовме до Државниот градежен инспекторат ќе бидат одбиени, но нека внимаваат. Некој ќе треба да одговара за ова.

Сметате ли дека зад случајот „Космос“ се крие политика? Јавно се говори дека ова е притисок врз Вас и врз Вашата партија од опозиција да преминете во позиција.

И да не сакам така да размислувам, сепак е тоа политика... Или е политика или навлегување во бизнисот на одредени луѓе кои се и на јавни функции.

Дали последните случувања само го забетонираа Вашето опозиционерско дејствување?

Не знам зошто немав проблеми додека бев во власта? Како е можно тогаш да сум работел правилно, а сега кога ја сменив страната и преминав во опозиција да работам противзаконски. Јас не сум дел од СДСМ. Тоа треба да се објасни. Имам поинакви размислувања за политиката, но веднаш се прават работи кои што не треба да се прават и кои не се законски. Ние како партија сме пратеничка група и сме дел од опозицијата! Јас и на почетокот, и пред и по изборите, кажав дека ќе дејствуваме како опозиција - до крај!. Што ќе преземеме во иднина ќе кажеме откако ќе заседава Централниот одбор на партијата. Добро ќе размислиме како ќе дејствува и нашата пратеничка група, односно дали ќе треба да се оди на седниците на Собранието или ќе излеземе од него.

Најавивте свикување седница на Собрание на која ќе се расправа за случајот со „Космос“ и формирање анкетна комисија.

Собранието до 18 август е на годишен одмор. Ќе го направиме тоа веќе на првиот работен ден, кога ќе побараме формирање на Анкетна комисија. Имам поддршка од сите опозициони партии, односно од опозиционата коалиција. На таа собраниска седница македонската јавност ќе биде информирана за тоа како се работи и постапува, но и за нерегуларностите во конкретниот случај. Ова не е „Фиком“. Ова е случај за кој е заинтересирана целокупната домашна јавност.

Во јавноста се говори за Ваше преземање на А2 телевизија, дотолку повеќе што долгот на оваа телевизија е проценет на 150.000 евра.

Ние како семејство, а пред се' мојот син, бидејќи најчесто него го посочуваат како иден сопственик на телевизијата, нема да се занимаваме со медиумски бизнис. Дали А2 Телевизија ќе ја преземе другиот зет на Рамковски или некој трет тоа е нивен проблем.

Доколку не успеете во намерите и не го спасите „Космос“, дали тогаш може да се очекува предавање на случајот на Судот во Стразбур?

Знаете каква е процедурата. Најпрво треба да ги поминете сите судски инстанци во државата, па дури потоа се оди во Стразбур, под претпоставка тука да не го добиеме спорот. Убеден сум дека процесот ќе го добиеме во нашите судови и тоа без оглед на тоа кој ќе постапува по него. Аргументите и доказите се на наша страна, само прашање ќе биде колку ќе биде висината на штетата.